राँझा (बाँके), ३० जेठ । पश्चिम नेपालको प्रमुख बिरामी प्रेषण केन्द्रका रूपमा रहेको नेपालगञ्जस्थित भेरी अस्पतालमा नवजात शिशुको उपचार सेवालाई थप प्रभावकारी र सहज बनाउन नवजात सघन उपचार कक्ष (एनआईसीयू) विस्तार गरिने भएको छ।

अस्पतालमा हाल सञ्चालनमा रहेका आठ वटा एनआईसीयू शय्या बढाएर २० वटा पुर्‍याउने लक्ष्यका साथ आवश्यक उपकरण थप गर्ने काम अघि बढाइएको अस्पतालका प्रमुख मेडिकल सुपरिन्टेन्डेन्ट डा. नवीन दर्नालले जानकारी दिनुभयो।

उहाँका अनुसार एनआईसीयू शय्याको अभावका कारण जटिल स्वास्थ्य समस्या भएका नवजात शिशुलाई अन्य अस्पतालमा प्रेषण (रेफर) गर्नुपर्ने बाध्यता रहेको छ। सेवा विस्तारपछि अस्पतालले आफ्नै स्रोत–साधनमार्फत थप नवजात शिशुलाई उपचार सेवा प्रदान गर्न सक्नेछ। साथै, अन्य अस्पतालबाट प्रेषित भई आउने शिशुहरूलाई समेत एनआईसीयू सेवा उपलब्ध गराउन सहज हुने विश्वास गरिएको छ।

भेरी अस्पतालमा हाल सामान्य तथा शल्यक्रियामार्फत दैनिक ३० देखि ४० जना महिलाको सुत्केरी सेवा हुँदै आएको छ। यस्तो अवस्थामा नवजात शिशुको उपचार सेवा विस्तारले मातृ तथा शिशु स्वास्थ्य सेवाको गुणस्तर अभिवृद्धिमा महत्त्वपूर्ण योगदान पुग्ने अपेक्षा गरिएको छ।

थप एनआईसीयू शय्या सञ्चालनका लागि आवश्यक चिकित्सक तथा स्टाफ नर्सको व्यवस्थापन गरिसकिएको र सेवा विस्तारको तयारी अन्तिम चरणमा पुगेको अस्पताल प्रमुख डा. दर्नालले बताउनुभयो।

अस्पताल प्रशासनले विगतमा विभिन्न कारणले बन्द भएका सेवाहरू पुनः पूर्ण रूपमा सञ्चालनमा ल्याउने तथा नयाँ सेवाहरू थप्दै अस्पताललाई क्षेत्रीयस्तरको सुविधासम्पन्न स्वास्थ्य संस्थाका रूपमा विकास गर्ने लक्ष्यका साथ योजनाबद्ध रूपमा काम गरिरहेको जनाएको छ।

“सेवाको पहुँच र गुणस्तर वृद्धि गर्दै अस्पताललाई थप प्रभावकारी स्वास्थ्य सेवा केन्द्रका रूपमा स्थापित गर्ने हाम्रो लक्ष्य हो,” मेडिकल सुपरिन्टेन्डेन्ट डा. दर्नालले भन्नुभयो।