चितवन, २६ जेठ । चितवन मेडिकल कलेज (सिएमसी) मा २१ वर्षीया एक युवतीको मस्तिष्कमा फुटेको नसाको चिरफार नगरी सफल शल्यक्रिया सम्पन्न भएको छ।

चिकित्सा विज्ञानको क्षेत्रमा दुर्लभ मानिने यस प्रकारको शल्यक्रिया सफलतापूर्वक सम्पन्न भएपछि ती युवतीलाई आज अस्पतालबाट डिस्चार्ज गरिने अस्पतालले जनाएको छ।

अस्पतालका ‘इन्टरभेन्सनल रेडियोलोजिस्ट’ डा. विवेककुमार साह र ‘कार्डियोभास्कुलर सर्जन’ प्रा. डा. अनिल आचार्य नेतृत्वको टोलीले उक्त शल्यक्रिया सम्पन्न गरेको हो।

डा. साहका अनुसार चितवनको इच्छाकामना गाउँपालिका निवासी ती युवती खाना खान नसक्ने समस्या लिएर तीन दिनअघि सिएमसी अस्पताल पुगेकी थिइन्। प्रारम्भिक परीक्षणपछि गरिएको एमआरआई र सिटी स्क्यानबाट उनको मस्तिष्कको ठूलो नसा फुटेको पत्ता लागेको थियो।

कार्डियोभास्कुलर सर्जरीमार्फत नसा फुटेको स्थानसम्म पुग्न कठिन हुने अवस्था रहेकाले आधुनिक ‘न्युरो इन्टरभेन्सनल’ प्रविधिको प्रयोग गरी चिरफार नगरी उपचार गरिएको डा. साहले बताउनुभयो। उहाँका अनुसार फुटेको नसाको स्थानमा ‘फ्लो डाइभर्टर’ (जाली) राखेर उपचार गरिएको हो।

उहाँले भन्नुभयो, “यस प्रकारको समस्या दुर्लभ मानिन्छ। करिब एक हजार जनामध्ये एक जनामा मात्र यस्तो समस्या देखिने गर्दछ।” यस्तो अवस्थामा जोखिमयुक्त भागलाई सुरक्षित रूपमा बन्द गरेर नसा जोगाउनुपर्ने उहाँको भनाइ छ।

अस्पतालका ‘क्याथल्याब इन्चार्ज’ अमृत काफ्लेका अनुसार यस्ता जटिल तथा जोखिमपूर्ण उपचारका लागि दक्ष जनशक्ति र अत्याधुनिक उपकरण आवश्यक पर्छ। अस्पतालमा उपलब्ध ‘बाइ–प्लेन क्याथ ल्याब’ सुविधाकै कारण यो उपचार सम्भव भएको उहाँले बताउनुभयो।

आइतबार शल्यक्रिया गरिएकी ती युवतीलाई सोमबार वार्डमा सारिएको थियो। स्वास्थ्य अवस्था सन्तोषजनक रहेकाले आज डिस्चार्ज गर्ने तयारी गरिएको काफ्लेले जानकारी दिनुभयो।

डा. साहका अनुसार शरीरको प्रतिरक्षा प्रणाली कमजोर हुँदा रक्तनली (नसा) पनि कमजोर भई फुट्ने जोखिम बढ्न सक्छ। उपचारका क्रममा नसा थप फुट्न सक्ने सम्भावना रहने भएकाले अत्यन्त सावधानीपूर्वक उपचार गर्नुपर्ने उहाँले बताउनुभयो।

उहाँले भन्नुभयो, “चिरफार नगरी धेरै प्रकारका शल्यक्रिया गरिए पनि यस प्रकृतिको जटिल शल्यक्रिया भने पहिलोपटक गरिएको हो।”