नेपालगन्ज, २६ जेठ । जलवायु परिवर्तनसम्बन्धी विद्यालयस्तरीय सचेतना कार्यक्रमअन्तर्गत बैजनाथ गाउँपालिकामा सिकाइ साझेदारी तथा समीक्षा बैठक सम्पन्न भएको छ।
बैजनाथ गाउँपालिकाको सहयोग तथा बास नेपालको आयोजनामा सम्पन्न बैठकमा सहभागी प्रधानाध्यापकहरूले जलवायु परिवर्तनसम्बन्धी सचेतना कार्यक्रमले छोटो अवधिमै सकारात्मक उपलब्धि हासिल गरेको बताएका छन्।
कार्यक्रममा बोल्दै श्री सूर्योदय माध्यमिक विद्यालय, चिसापानीका प्रधानाध्यापक दीपकबहादुर शाहीले जलवायु परिवर्तनसम्बन्धी सचेतना कार्यक्रम प्रभावकारी र समयसापेक्ष रहेको बताउनुभयो। उहाँले जलवायु परिवर्तन वर्तमान समयको प्रमुख चुनौती भएकाले विद्यार्थीसँगै अभिभावकलाई पनि सचेत बनाउन आवश्यक रहेकोमा जोड दिनुभयो।
बैठकमा सहभागी प्रधानाध्यापकहरूले विद्यालय सरसफाइ, हरियाली प्रवर्द्धन, शुद्ध खानेपानीको व्यवस्था तथा अन्य आधारभूत आवश्यकताहरूको समाधानका लागि गाउँपालिकाले थप प्राथमिकता दिनुपर्ने धारणा राखेका थिए।
कार्यक्रमका क्रममा जलवायु परिवर्तन सचेतना अभियानमा सहभागी विद्यार्थीहरूले आफ्ना अनुभव तथा सिकाइहरू आदानप्रदान गरेका थिए। उनीहरूले कार्यक्रममार्फत वातावरण संरक्षण, वृक्षारोपण, फोहोर व्यवस्थापन तथा जलवायु परिवर्तनका प्रभावबारे महत्वपूर्ण ज्ञान हासिल गरेको बताएका थिए।
बास नेपालकी केन्द्रीय महासचिव कल्पना अधिकारीले सहजीकरण गर्नुभएको बैठकमा संस्थाका निर्देशक हेमराज भट्टले जलवायु परिवर्तनसम्बन्धी सचेतना कार्यक्रमको उद्देश्य, प्राप्त उपलब्धि, सिकाइ, चुनौती तथा आगामी कार्ययोजनाबारे प्रस्तुतीकरण गर्नुभएको थियो।
बैठकमा बैजनाथ गाउँपालिका–१ स्थित श्री सूर्योदय माध्यमिक विद्यालय, वडा नं. ५ का श्री सुन्दर आधारभूत विद्यालय, श्री सिंह भवानी आधारभूत विद्यालय र श्री नेपाल राष्ट्रिय माध्यमिक विद्यालय गुरुवागाउँ तथा वडा नं. ७ स्थित श्री नेपाल राष्ट्रिय माध्यमिक विद्यालय पेडारीका प्रधानाध्यापक, सम्पर्क शिक्षक तथा जलवायु क्लबमा आबद्ध विद्यार्थीहरूको सहभागिता रहेको थियो।
सहभागीहरूले विद्यालयस्तरबाट जलवायु परिवर्तनसम्बन्धी सचेतना विस्तार गर्न यस्ता कार्यक्रमलाई निरन्तरता दिनुपर्नेमा जोड दिएका थिए।
