काठमाडौँ । चौवन्नौँ विश्व वातावरण दिवसको अवसरमा ज्ञानशाला अनुसन्धान केन्द्रले काठमाडौँ उपत्यकास्तरीय निबन्ध लेखन प्रतियोगिता सम्पन्न गरेको छ ।

काठमाडौँका १९ ओटा विद्यालयका २९ जना विद्यार्थीको सहभागितामा २०८३ जेठ २३ गते सो नयाँबजारस्थित सी.ई.ए. हाइस्कुलमा सो कार्यक्रम सम्पन्न भएको हो ।

कक्षा ९ र १० का विद्यार्थीको सहभागिता रहेको उक्त प्रतियोगितामा सरस्वती माध्यमिक विद्यालय प्रथम, अमृत सेकेन्डरी स्कुल म्हेपी द्वितीय र हिमरश्मी विद्यालय तृतीय भएका थिए । त्यस्तै ग्रीन फिल्ड विद्यालय र रिड मोडेल विद्यालयले सान्त्वना स्थान प्राप्त गरेका थिए ।

पुरस्कारस्वरूप विजयी हुने प्रथमलाई छ हजार, द्वितीयलाई चार हजार, तृतीयलाई तीन हजार र सान्त्वना पुरस्कारस्वरूप दुई विद्यालयलाई एक हजार पाँच सय रुपियाँ प्रदान गरिएको थियो ।

निबन्धको मूल्याङ्कन साहित्यकारहरू शेखर अर्याल र सीताराम ढकालले गर्नुभएको थियो ।

ज्ञानशालाका अध्यक्ष भोला ढकालको अध्यक्षता तथा समीर सिंह र विष्णुहरि देवकोटाको सञ्चालनमा अघि बढेको उक्त कार्यक्रममा गण्डकी प्रदेशसभाका पूर्व सांसद ललिता गुरुङको प्रमुख उपस्थिति रहेको थियो ।

एन.आर.ए.सी. का अध्यक्ष प्रकाश घिमिरेले आर्थिक सहयोग गर्नुभएको सो कार्यक्रममा सी.ई.ए. हाइस्कुलका अध्यक्ष विश्वनाथ अधिकारीले पनि मन्तव्य राख्नुभएको थियो ।