भक्तपुर । राष्ट्रिय परीक्षा बोर्डले यस वर्षको (२०८२ सालको) माध्यमिक शिक्षा परीक्षा (एसइई) को नतिजा २०८३ वैशाख २८ गते सोमबार राति ९:१५ बजे सार्वजनिक गरेको छ ।
सरकारले वैशाख २९ गतेभित्र नतिजा सार्वजनिक गर्नुपर्ने समयसीमा दिएपछि बोर्डले तीव्र गतिमा तयारी गरी परीक्षा सम्पन्न भएको २९ दिनमा नतिजा सार्वजनिक गरेको हो ।
परीक्षा नियन्त्रण कार्यालय सानोठिमीमा सोमबार राति आयोजित पत्रकार सम्मेलनमा एसइई परीक्षामा ६५ दशमलव ९८ प्रतिशत विद्यार्थी उत्तीर्ण भएका शिक्षासचिव चूडामणि पौडेलले जानकारी दिए ।
उनका अनुसार परीक्षामा दुई लाख ८४ हजार एक सय ६० विद्यार्थी ग्रेडेड भएका र एक लाख ४६ हजार पाँच सय सात परीक्षार्थी ननग्रेडेड भएका छन् ।
यसपटक एसइईमा दुई लाख ५७ हजार पाँच सय २७ छात्रा र दुई लाख ५२ हजार चार सय ३४ छात्रले परीक्षाको फाराम भरेकोमा चार लाख ३० हजार छ सय ६७ जना परीक्षामा सहभागी भएको शिक्षासचिव पौडेलले जानकारी दिए ।
सार्वजनिक नतिजाअनुसार ४८ हजार तीन सय ९२ परीक्षार्थीले सबैभन्दा उच्च जिपिए अर्थात् तीन दशमलव ६० देखि चार ल्याएका छन् भने ८० हजार तीन सय ७२ जनाले तीन दशमलव २० देखि तीन दशमलव ६० जिपिए ल्याएका छन् ।
त्यस्तै, ९४ हजार दुई सय २२ जनाले दुई दशमलव ८० देखि तीन दशमलव २० जिपिए, ५५ हजार नौ सय ७७ जनाले दुई दशमलव ४० देखि दुई दशमलव ८० जिपिए, पाँच हजार एक सय ९० जनाले दुईदेखि दुई दशमलव ४० जिपिए र सात जनाले एक दशमलव ६० देखि दुई जिपिए ल्याएका शिक्षासचिव पौडेलले बताए ।
पौडेलका अनुसार ननग्रेडेड (एनजी) प्राप्त गर्ने विद्यार्थीले पुन: ग्रेडवृद्धि परीक्षा दिनुपर्नेछ । दुई विषयसम्म एनजी आउने विद्यार्थीका लागि तत्कालै ग्रेडवृद्धि परीक्षा सञ्चालन गरिने जनाउँदै सोभन्दा बढी विषयमा एनजी आउनेहरू अर्को वर्षको नियमित परीक्षामा सहभागी हुनुपर्ने व्यवस्था गरिएको पत्रकार सम्मेलनमा उनले बताए ।
यस वर्ष एक महिनाभित्र नतिजा सार्वजनिक गर्ने शिक्षा मन्त्रालयको निर्देशनपछि बोर्डले परीक्षा केन्द्रमा उत्तरपुस्तिका परीक्षण गराएको थियो ।
वैशाख ५ गतेसम्ममा देशैभरबाट उत्तरपुस्तिका बोर्डको कार्यालयमा सङ्कलन गरी नतिजा अध्यावधिक गर्ने, कम्प्युटरमा प्रविष्ट गराउने काम थालिएको थियो । गत वर्ष असार १३ गते परीक्षाफल सार्वजनिक भएको थियो ।
