काठमाडौँ । प्रतिनिधिसभा संसद्को पहिलो अधिवेशन आजदेखि प्रारम्भ हुँदैछ । गत फागुन २१ मा सम्पन्न भएको निर्वाचन पछि निर्वाचित प्रतिनिधिसभा सदस्य संसदको आज हुने पहिलो बैठक हो ।
सिंहदरबारस्थित निर्माणाधीन संघीय संसद्मा आज दिउँसो २ बजेदेखि प्रतिनिधिसभा बैठक आह्वान गरिएको छ ।
बैठकमा आज विभिन्न शिर्ष नेताहरूले सम्बोधन गर्ने कार्यक्रमको साथसाथै तीन अध्यादेश पेस हुँदैछन् । बैठकमा गृहमन्त्री सुधन गुरुङले ‘मतदाता नामावली (पहिलो संशोधन) अध्यादेश २०८२, ‘प्रतिनिधिसभा सदस्य निर्वाचन (पहिलो संशोधन) अध्यादेश, २०८२ र ‘नेपाल विशेष सेवा (दोस्रो संशोधन) अध्यादेश २०८८२ पेस गर्ने सम्भावित कार्यसूची तय भएको छ ।
बैठकमा ज्येष्ठ सदस्य अर्जुन नरसिंह केसीले नेपालको संविधानको धारा, १०४ बमोजिम प्रतिनिधिसभाले आफ्नो नियमावली नबनाएसम्मका लागि प्रतिनिधिसभा नियमावली, २०७९ बमोजिम कामकारबाही गर्ने प्रस्ताव स्वीकृतिका लागि प्रस्तुत गर्ने संघीय संसद् सचिवालयका महासचिव पद्मप्रसाद पाण्डेयले जानकारी दिए ।
आज सभामुखको अनुपस्थितिमा बैठकको अध्यक्षता गर्ने सदस्यहरूको मनोनयन गर्ने सम्भावित कार्यसूची समेत छ ।
आजकै बैठकबाट सभामुख निर्वाचन तालिका सार्वजनिक हुनेछ । बुधबार बसेको सर्वदलीय बैठकले चैत २२ गते सभामुखको निर्वाचन हुने तालिकामा सहमति जुटेको थियो ।
सभामुखका लागि सत्तासिन पार्टीका उपसभापति डोलप्रसाद अर्याललाई तयारी गरिरहेको छ । अर्यालले पार्टीको साधारण सदस्य समेत नरहने गरि पार्टीबाट राजीनामा दिएर सभामुखका लागि तयार रहेको श्रोतले जानकारी दिएको छ ।
