काठमाडौं । पूर्वप्रधानमन्त्री तथा पार्टी अध्यक्ष केपी शर्मा ओलीलाई पक्राउ गरेको विरोधमा उत्रिएका नेकपा (एमाले) कार्यकर्ता युवराज ओलीमाथि लाठीचार्जसँगै भोलि सरमुकामकेन्द्रित प्रदर्शन हुने भएको छ ।
२०८२ चैत १४ गते शनिबार माइतीघर–बबरमहल क्षेत्रमा लाठीचार्चका क्रममा एमाले कार्यकर्ता ओलीलगायतका नेताकार्यकर्ता घाइते भएका हुन् ।
माइतीघर–बबरमहल क्षेत्रमा प्रदर्शन भइरहेका बेला एउटा समूह सिंहदरबारको दक्षिण गेटतर्फ प्रदर्शन गर्न पुगेको थियो । त्यसै क्रममा प्रहरीले प्रदर्शनकारीमाथि लाठीप्रहार गरेको थियो ।
ओलीको टाउकोमा नै प्रहरीको लाठी लागेको बताइएको छ । लाठी लागेर रगतपिच्छे भएपछि उनलाई नजिकै रहेको अन्नपूर्ण न्यूरो अस्पताल लगिएको जानकारी दिइएको छ ।
यता, एमाले केन्द्रीय सचिव महेश बस्नेतले भोलि आइतबार पनि देशैभरिका सदरमुकामकेन्द्रित प्रदर्शन गर्ने बताएका छन् ।
उनले सामाजिक सञ्जालमा लेखेका छन्– “यही अवस्था रहेमा भोलि १२ बजे पार्टीका देशभरका जिल्ला सदरमुकाममा हुने आन्दोलन अझ सशक्त र प्रतिरोधात्मक बन्नेछ ।
पूर्वाग्रह र प्रतिशोधको मूल्य अत्यन्त महँगो हुने दाबी गर्दै उनले अध्यक्ष ओलीलाई अविलम्ब रिहा गर्न बालेन सरकार र कथित गृहमन्त्री सुधन गुरुङसित माग गरेका छन् ।
उनले लेखेका छन्– “हिजो सिंहदरबार, सर्वोच्च अदालतलगायतका सरकारी सम्पत्तिमा तोडफोड र आगजनी गर्ने बालेन्द्र शाह र सुधन गुरुङद्वारा परिचालित अराजक समूहलाई सरकारले दमन गर्यो भन्नेहरू अहिलेको शान्तिपूर्ण आन्दोलनमा किन दमन गर्दैछन् ?”
उनले थपेका छन्– “तोडफोड भएका गाडीको क्षतिपूर्तिबारे छलफल गरौँला । दुईतिहाइको दम्भ बन्द गर । घाइतेको तुरुन्त उपचार गर । गिरफ्तार गरिएकालाई अविलम्ब रिहा गर ।”
उनले भोलि पनि माइतीघर मण्डलामा एमाले जनसङ्गठनको आन्दोलन जारी रहने जानकारी दिएका छन् ।
