टेकराज भुसाल, सन्धिखर्क ।
जिल्लाको भूमिकास्थान नगरपालिका–१ ढाकाबाङस्थित विश्व माध्यमिक विद्यालयलाई नेपाल टेलिकमले १२ थान कम्प्युटर हस्तान्तरण गरेको छ ।
२०८२ चैत १२ गते बिहीबार आयोजित एक कार्यक्रममा नेपाल टेलिकम प्रादेशिक निर्देशनालय भैरहवाका प्रशासनिक अधिकृत निराजन पण्डित तथा वरिष्ठ सहायक राम बन्जाडेले कम्प्युटर हस्तान्तरण गर्नुभएको हो ।
कार्यक्रममा बोल्दै प्रशासनिक अधिकृत पण्डितले सूचना प्रविधिको विकाससँगै शिक्षालाई डिजिटल माध्यमसँग जोड्नु अत्यन्त आवश्यक रहेको बताउनुभयो ।
कार्यक्रममा विद्यालयका सहायक प्राचार्य सन्तबहादुर केसीले नेपाल टेलिकमप्रति आभार व्यक्त गर्दै यस सहयोगले विद्यालयको सूचना प्रविधि शिक्षामा ठुलो टेवा पुग्ने बताउनुभयो ।
कार्यक्रममा शिक्षकहरू खुमबहादुर बस्नेत, रमेश चौधरी तथा भूमिकास्थान युवा सञ्जालका संयोजक टेकराज भुसालसहित विद्यार्थीको उपस्थिति रहेको थियो।
यस सहयोगले विद्यालयको शैक्षिक गुणस्तर अभिवृद्धि गर्नुका साथै डिजिटल शिक्षाको पहुँच विस्तारमा महत्त्वपूर्ण भूमिका खेल्ने अपेक्षा गरिएको छ ।
