काठमाडौ । नेकपा (मसाल) ले लिपुलेक हुँदै चीन–भारत व्यापार गर्ने निर्णयको विरोध गरेको छ ।
महामन्त्री सिंहको हस्ताक्षरमा २०८२ चैत ११ गते बुधबार प्रेसवक्तव्य जारी गर्दै मसालले विरोध गरेको हो ।
चीन–भारतको उक्त निर्णय नेपाली राष्ट्रियता र सार्वभौमिकताको विरुद्ध भएको बताइएको सो विज्ञप्तिमा अगाडि भनिएको छ–
“अहिले चीन र भारतले लिपुलेकको बाटो भएर व्यापार गर्ने तयारी गरिरहेको कुरा समाचार माध्यमले बाहिर ल्याएका छन् । लिपुलेक नेपालको अभिन्न भाग हो । त्यसकारण नेपालको सहमतिविना लिपुलेक भएर चीन र भारतले व्यापार गर्ने जुन सहमति गरेका छन्, त्यो नेपालको राष्ट्रियता र सार्वभौमिकता विरुद्धको कुरा हो । त्यसैले हाम्रो पार्टीले सुरुदेखि नै त्यसको विरोध गर्दै आएको छ र अहिले पनि त्यो बाटो भएर चीन र भारतका बिचमा व्यापार गर्ने जुन कुरा उठिरहेको छ, त्यसको हाम्रो पार्टीले कडा शब्दमा विरोध गर्दछ ।”
