लालमटिया (दाङ) । ऐरावती आदर्श बहुमुखी क्याम्पस राप्ती गाउँपालिका–२ लालमटिया, दाङको सत्रौँ वार्षिकोत्सव कार्यक्रम बुधबार सम्पन्न भएको छ ।
क्याम्पसका संस्थापक सदस्य तथा संविधानसभा सदस्य रश्मिराज नेपालीको प्रमुख आतिथ्य तथा क्याम्पस सञ्चालक समितिका अध्यक्ष केशवराज खनालको अध्यक्षतामा सो कार्यक्रम सम्पन्न भएको हो ।
प्रमुख अतिथि नेपालीले नेपाल र नेपालको इतिहास, भूगोल, संस्कार र संस्कृतिबारे विद्यार्थीले गहिरो अध्ययन र चिन्तन गर्नुपर्ने आवश्यकता रहेको बताउनुभयो ।
उहाँले पछिल्लो समय विद्यार्थीमा अनुशासन र राष्ट्रप्रेमको भावना कमजोर बन्दै गएको बताउँदै शैक्षिक उत्कृष्टतासँगै चरित्र निर्माणमा जोड दिन आग्रह गर्नुभयो ।
कार्यक्रममा क्याम्पस प्रमुख विक्रान्त ज्ञवालीले क्याम्पसको वार्षिक प्रगति विवरण प्रस्तुत गर्नुभएको थियो । कार्यक्रममा पूर्व अध्यक्ष सूर्यप्रकाश शर्मा, सल्लाहकार द्रोण भुसाल, चैतन्य पाठशालाकी प्रिन्सिपल सुष्मा रेग्मी, सर्वोदय माध्यमिक विद्यालयका प्रधानाध्यापक विनोदकुमार गुप्ता, भालुबाङ खानेपानी उपभोक्ता समितिका अध्यक्ष हस्तबहादुर गुरुङ, महाप्रभु वचत तथा ऋण सहकारी संस्थाका अध्यक्ष किरण भण्डारी, राष्ट्रिय जनमोर्चा दाङका नेता बाबुराम थापालगायतका वक्ताले शुभकामना मन्तव्य व्यक्त गर्नुभएको थियो ।
नयाँ क्याम्पससभा सदस्य घनश्याम ज्ञवाली, भागवत ज्ञवाली, शारदा देवकोटा, अशोक खनाल, गोपाल पोख्रेल, मोहनकुमार श्रेष्ठ, विभीषण अधिकारी, जानका खनाल, बोधीराज घिमिरेलाई कार्यक्रममा प्रमाणपत्र वितरण गरिएको थियो ।
क्याम्पसमा स्थापना गरिएको तामपितम अक्षयकोष, जगतप्रसाद पौडेल स्मृतिकोष, रविलाल बोधकुमारी न्यौपाने अक्षयकोष र धनबहादुर कुमारीदेवी भट्टराई अक्षयकोषबाट विपन्न, दलित, जेहेन्दार विद्यार्थीरूलाई छात्रवृत्ति प्रदान गरिएको थियो ।
सहायक प्राध्यापक धनबहादुर रावललाई उत्कृष्ट प्राध्यापकको रूपमा सम्मान गरिएको थियो ।
त्यस्तै कार्यक्रममा सप्ताहव्यापी अन्तरक्याम्पस स्तरीय खेलकुद प्रतियोगिताका विजेतालाई पुरस्कार वितरण गरिएको थियो ।
सञ्चालक समिति उपाध्यक्ष विलोचन चौधरीको स्वागत मन्तव्यबाट सुरु भएको कार्यक्रमको सञ्चालन सहायक क्याम्पस प्रमुख तुलसीराम पौडेलले गर्नुभएको थियो ।
कार्यक्रममा विद्यार्थीले लोकनृत्य, गजल र कविता प्रस्तुत गरेका थिए ।
