काठमाडौँ । फागुन ४ गते बिहान १० बजेदेखि ५ गते बिहानसम्म देशभर आगलागीसहित कुल १९ ओटा बिपतका घटना भएका छन् ।
राष्ट्रिय बिपत जोखिम न्यूनीकरण तथा व्यवस्थापन प्राधिकरणका अनुसार त्यसमध्ये १५ ओटा त आगलागीका घटना रहेका छन् ।
असावधानीका कारण आगलागीका घटनामा वृद्धि भएको प्राधिकरणको विवरणमा उल्लेख छ । हिउँदको मौसममा सामान्य सावधानी अपनाउँदा समेत रोक्न सकिने आगलानीका घटना भएको पाइएको छ ।
प्राधिकरणका अनुसार, तेह्रथुम, सङ्खुवासभा, मोरङमा एक/एक आगलागीका घटना हुँदा सिरहा, सर्लाही र स्याङजामा दुई/दुई ओटा आगलागीका घटना भएका छन् । यस्तै, बारा, पर्सा, रुपन्देही, बझाङमा पनि आगलागीका कारण भौतिक सम्पत्तिको क्षति भएको छ ।
सङ्खुवासभा, सोलुखुम्बु र सर्लाहीमा डढेलोको घटना भए । त्यस्तै, बैतडीमा जनावरको आक्रमण भएको छ । विपदमा परेर छ जना घाइते भए भने रु ३४ लाख १२ हजार बराबरको क्षति भएको छ ।
प्राधिकरणले हिउँदको समयमा सबैतिर सुक्खा हुने भएकाले आगलागी हुने सम्भावना बढी भएकाले सचेतना अपनाउन आग्रह गरेको छ ।
