टेकराज भुसाल, सन्धिखर्क ।
भूमिकास्थान नगरपालिकाले सञ्चालनमा ल्याएको ‘बुक फ्री फ्राइडे’ कार्यक्रम प्रभावकारी बन्दै गएको छ ।
विद्यार्थीलाई पाठ्यपुस्तकभन्दा बाहिरबाट सिकाइ अनुभव दिलाउने लक्ष्यका साथ सुरु गरिएको यो अभियान अहिले नगरका विद्यालयमा सकारात्मक परिवर्तनको आधार बनेको छ ।
नगरपालिकाले प्रत्येक शुक्रबार कक्षामा पुस्तकविना सृजनात्मक, व्यावहारिक र सिपमूलक गतिविधि सञ्चालन गर्ने व्यवस्था गरेको छ । यसले विद्यार्थीमा आत्मविश्वास, नेतृत्व क्षमता, अभिव्यक्ति कौशल र सामाजिक ज्ञान बढाउन ठुलो भूमिका खेलेको विद्यालयले बताएका छन् ।
विद्यार्थीले सामूहिक रूपमा गोलभेँडा तथा अन्य तरकारी खेती, सालको पातबाट टपरी बनाउनेलगायतका कार्य गर्दै आइरहेको नगरपालिकाले जनाएको छ।
विश्व मावि ढाकाबाङका शिक्षक जुमलाल खनालका अनुसार ‘बुक फ्री फ्राइडे’ ले विद्यार्थीलाई पाठ्यपुस्तक केन्द्रित शिक्षाबाट बाहिर निकालेर जीवनोपयोगी सिप, वादविवाद, खेलकुद, कला, वातावरणीय सिकाइ, सामुदायिक अध्ययन, समूहगत कार्यजस्ता अभ्यासमा जोड दिएको छ ।
“यो कार्यक्रमपछि विद्यार्थी कक्षा सक्रिय, आत्मनिर्भर र उत्साहित बनेका छन्’ शिक्षक खनालले बताए ।
भूमिकास्थान नगरपालिकाका नगरप्रमुख झबिलाल थापाका अनुसार विद्यार्थीलाई किताब मात्र होइन, अनुभवबाट पनि सिक्न सकिन्छ भन्ने धारणा स्थापित गर्न यो अभियान सुरु गरिएको हो । अभिभावक, शिक्षक र विद्यालय व्यवस्थापनको सहकार्यले कार्यक्रम अझै प्रभावकारी बन्दै गएको छ ।
यसैबिच, नगरपालिकाले आगामी दिनमा बुक फ्री फ्राइडेअन्तर्गत नयाँ गतिविधि, सिपविकास तालिम, स्थानीय संसाधनको उपयोग तथा सामुदायिक सहभागिता थप विस्तार गर्ने नगरप्रमुख थापाले बताए ।
स्थानीय अभिभावकका अनुसार यो पहलले बच्चामा सामाजिक व्यवहार, टिमवर्क, संस्कार र अनुशासनजस्ता पक्षमा उल्लेख्य सुधार देखिएको छ ।
