बेलबारी (मोरङ) । मोरङको बेलबारी–१ स्थित सगरमाथा इङलिस स्कुलले पूर्व विद्यार्थी भेला प्रथम भेला तथा शुभकामना आदानप्रदान कार्यक्रम सम्पन्न गरेको छ ।
स्कुलको तिसौँ वार्षिकोत्सव तथा एसएलसी/एसइईमा सहभागिता रजतवर्ष एवम् नेपाली पर्वको अवसर पारेर २०८२ असोज १५ गते स्कुलकै सभाकक्षमा सो कार्यक्रम सम्पन्न भएको हो ।
७० जना पूर्व विद्यार्थी र छ जना पूर्वशिक्षकको उपस्थिति रहेको सो कार्यक्रममा पूर्व विद्यार्थीमध्ये सरकारी सेवामा कार्यरतको तर्फबाट निशिप निरौला, उद्योगी–व्यवसायीको तर्फबाट नवराज सुवेदी, सेनाप्रहरीका कार्यरतका तर्फबाट नेवाहाङ राई, पूर्व विद्यार्थीको तर्फबाट दिवस तामाङ, प्राध्यापकका तर्फबाट उपप्रा तथा इन्जिनियर राजु अन्सारी, विद्यार्थी नेतृत्वका तर्फबाट दीपक गुरुङ, चिकित्साविज्ञानका तर्फबाट दीक्षा खड्का र निजी सेवामा कार्यरतका तर्फबाट समीक्षा घिमिरेले विगतका रमाइला र स्कुलले शैक्षिक उन्नयनका लागि खेलेको भूमिकाबारे बोलेका थिए ।
सो अवसरमा पूर्व शिक्षकको तर्फबाट फणिन्द्र विश्वकर्मा, विद्यालय व्यवस्थापन समितिका तर्फबाट सञ्चामाया लिम्बू र अतिथिका तर्फबाट पत्रकार अरूण बरालले मन्तव्य राखेका थिए ।
परिचयकै क्रममा यस स्कुलमा अध्ययनरत रहँदाका केही अविस्मरणीय प्रसङ्ग पूर्व विद्यार्थीहरू देवीप्रसाद भट्टराई, योगेन राई, समीर बस्नेत, जोसन खुलाल, अङ्कित सुवेदी, देवराज महतो र सञ्जय राईले राखेका थिए ।
कार्यक्रममा विव्यसका अध्यक्ष रामकुमार राईको अध्यक्षता, कार्यक्रम संयोजक शिक्षक रेखा सुवेदीको स्वागत मन्तव्य तथा निर्देशक लेखबहादुर धिमालको धन्यवाद मन्तव्य रहेको थियो ।
प्रिन्सिपल तथा कार्यक्रम सञ्चालक इरनकुमार राईद्वारा २०५२ पुस १० गते स्थापना गरिएको स्कुलले २०५८ सालदेखि एसएलसी/एसइई र २०८० सालदेखि एसएलसी (कक्षा १२) मा सहभागिता जनाएको र सात सयभन्दा बढीले उक्त तह उत्तीर्ण गरेको बताए ।
