काठमाडौँ । १७ विद्यार्थी सङ्गठनले भदौ २४ गतेसम्मका लागि सङ्घर्षको कार्यक्रम घोषणा गरेका छन् ।
२०८२ भदौ १६ गते रिपोर्टस् क्लबमा पत्रकार सम्मेलन आयोजना गर्दै उनीहरूले सङ्घर्षका कार्यक्रम घोषणा गरेका हुन् ।
घोषित कार्यक्रमअनुसार भदौ १७ र १८ गते राष्ट्रपति, प्रधानमन्त्री, प्रतिनिधिसभाका सभामुख, राष्ट्रियसभाका अध्यक्ष र शिक्षामन्त्रीलाई ज्ञापनपत्र बुझाउने, भदौ १९ गते सबै दलका सचेतक, विद्यार्थी पृष्ठभूमिका सांसद, राजनीतिक दलको शिक्षा विभागका प्रमुख र पूर्व विद्यार्थी सङ्गठनका अध्यक्षसित अन्तरक्रिया गर्ने, भदौ २० र २२ गते निःशुल्क शिक्षाका लागि हस्ताक्षर सङ्कलन, प्रचारप्रसार तथा रचनात्मक प्रदर्शन गर्ने, भदौ २३ गते देशैभरिका प्रमुख जिल्ला अधिकारीमार्फत प्रधानमन्त्री र शिक्षामन्त्रीलाई ज्ञापन बुझाउने र भदौ २४ गते उपत्यकालगायत देशव्यापी प्रदर्शन गरिनेछ ।
विद्यार्थी सङ्गठनले आफ्ना मागहरू नौओटा बुँदामा प्रस्तुत गरेका छन् । प्रेसविज्ञप्ति तीनओटा पृष्ठमा समेटिएको छ ।
प्रेसविज्ञप्तिमा अखिल (छैठौं) का अध्यक्ष सुवास जिसी, नेपाल विद्यार्थी सङ्घका अध्यक्ष दुजाङ शेर्पा, अनेरास्ववियुका अध्यक्ष डा. सुजन कडरिया, अनेरास्ववियुका अध्यक्ष विजयप्रकाश शर्मा सापकोटा, अनेरास्ववियूका अध्यक्ष महेश श्रेष्ठ, समाजवादी विद्यार्थी युनियनका अध्यक्ष मनिषकुमार यादव र अखिल (क्रान्तिकारी) का अध्यक्ष वीरेन्द्र शाहको हस्ताक्षर रहेको छ ।
त्यस्तै विज्ञप्तिमा अखिल (क्रान्तिकारी) का अध्यक्ष महेश श्रेष्ठ, विद्यार्थी जनमत सङ्घका संयोजक पोषण यादव, नयाँशक्ति विद्यार्थी युनियनका अध्यक्ष बलबहादुर रम्तेल, लोकतान्त्रिक विद्यार्थी सङ्घका अध्यक्ष रोशन मिश्र, वैज्ञानिक समाजवादी विद्यार्थी सङ्गठनका अध्यक्ष हिमांशु, अखिल (पाँचौँ) का अध्यक्ष पवित्रा आचार्य, राष्ट्रिय विद्यार्थी सङ्घका अध्यक्ष पङ्कज देव, अखिल नेपाल विद्यार्थी युनियनका अध्यक्ष मिनिष भट्टराई र समाजवादी विद्यार्थी युनियनका अध्यक्ष प्रकाश चाम्लिङ राईको हस्ताक्षर रहेको छ ।
