मस्कट । अमेरिका र यमनका हुथी विद्रोहीबिच युद्धविराम गर्न सहमति भएको यमनी मध्यस्थकर्ताले मङ्गलबार राति जानकारी गराएका छन् ।
यो सम्झौताले रेड सीमा ‘आवागमन स्वतन्त्रता’ सुनिश्चित गर्नेछ, जहाँ इरान समर्थित विद्रोहीले महिनौँदेखि पानीजहाजमा आक्रमण गरिरहेका छन् ।
अमेरिकी राष्ट्रपति डोनाल्ड ट्रम्पले विद्रोहीले जहाजलाई लक्षित गरी आक्रमण गर्न बन्द गर्न सहमत भएपछि अमेरिकाले हुथी विद्रोही विरुद्ध आक्रमण अन्त्य गरिने बताउनुभयो यद्यपि उहाँले सहयोगी इजरायलमा हालैका आक्रमणको प्रत्यक्ष उल्लेख गर्नुभएको छैन ।
ओमानका विदेशमन्त्री बद्र अल्बुसैदीले भन्नुभयो– ॅहालैको छलफल र सम्पर्कपछि तनाव कम गर्ने उद्देश्यका साथ दुई पक्षबिच युद्धविराम सम्झौता भएको छ ।’
उहाँले थप्नुभयो– ‘कुनै पनि पक्षले अर्को पक्षलाई निशाना बनाउने छैनन् । सम्झौताले आवागमनको स्वतन्त्रता र रेड सीमा अन्तर्राष्ट्रिय व्यावसायिक सामान ढुवानीको सहज प्रवाह सुनिश्चित गर्दछ ।’
ह्वाइट हाउसमा ट्रम्पले सात हप्ता लामो अमेरिकी बमबारीमा ३०० जनाको मृत्यु भएपछि विद्रोहीले आत्मसमर्पण गरेको बताएका थिए ।
विद्रोहीका राजनीतिक नेता महदी अल मशातले सम्झौताबारे कुनै टिप्पणी नगरे पनि इजरायलको मुख्य विमानस्थलमा क्षेप्यास्त्र प्रहारको बदलामा इजरायलले गरेको घातक आक्रमणको ‘पीडादायी’ जवाफ दिने वाचा गर्नुभएको थियो ।
हुथीका प्रवक्ता मोहम्मद अब्देलसलामले विद्रोहीको अल–मसिराह टेलिभिजन च्यानलसँग कुरा गर्दै अमेरिकाको कुनै पनि कदमको जबाफ प्राप्त हुने बताउनुभयो ।
हुथी विद्रोहीले सन् २०२३ को अन्त्यदेखि रेड सी र एडेनको खाडीमा इजरायल र व्यापारिक जहाजमाथि आक्रमण गर्दै आएका छन् ।
यमनका विद्रोहीले गाजा युद्धमा हालै दुई महिनासम्म चलेको युद्धविरामका क्रममा आफ्ना आक्रमण रोकेका थिए तर मार्चमा उनीहरूले गाजापट्टीमा इजरायलको सहायतालाई लिखित गरी गरिएको नाकावन्दीको विरोधमा पानीजहाजमा आक्रमण पुनः सुरु गर्ने चेतावनी दिएका थिए ।
मार्चको मध्यदेखि अहिलेसम्म यमनमा एक हजारभन्दा बढी लक्ष्यमा अमेरिकी आक्रमण भएको अमेरिकी रक्षा मन्त्रालय पेन्टागनले गत हप्ता बताएको थियो । (रासस/एएफपी)
