सियोल । मस्को र किएभबिचको द्वन्द्व सुरु भएयता पहिलोपटक रुसले युक्रेनविरुद्धको युद्धमा उत्तर कोरियाली सेनाले भाग लिएको स्वीकार गरेको रुस र दक्षिण कोरिया दुवैका सरकारी सञ्चारमाध्यमले जनाएका छन् ।
दक्षिण कोरियाली समाचार एजेन्सी योन्हापका अनुसार रुसी राष्ट्रपति भ्लादिमिर पुटिनसँगको भिडियो कन्फरेन्समा रुसका चिफ अफ जनरल स्टाफ भ्यालेरी गेरासिमोभले उत्तर कोरियाली सेनाले कुर्स्क सीमा क्षेत्रको मुक्तिका लागि महत्त्वपूर्ण भूमिका खेलेको बताउनुभयो ।
‘म कुर्स्क क्षेत्रको सीमावर्ती क्षेत्रको मुक्तिमा डेमोक्रेटिक पिपुल्स रिपब्लिक अफ कोरियाका सैनिकको सहभागिताबारे प्रकाश पार्न चाहन्छु । उनीहरूले हाम्रा देशहरू बिचको व्यापक रणनीतिक साझेदारीसम्बन्धी सन्धिअनुसार युक्रेनी सशस्त्र बलको आक्रमणकारी समूहलाई पराजित गर्न महत्त्वपूर्ण सहयोग प्रदान गरे’ गेरासिमोभले क्रेमलिनको वेबसाइटमा पोस्ट गरिएको भिडियो कन्फरेन्सको प्रतिलिपिमा भन्नुभयो ।
पुटिनले आफ्नो देशले सीमा क्षेत्र कुर्स्कको नियन्त्रण पुनः प्राप्त गरेको दाबी गर्नुभएको छ । कुर्स्कमा युक्रेनले गत वर्ष आश्चर्यजनक आक्रमण गरेको थियो ।
पुटिनका अनुसार कुर्स्क सीमा क्षेत्रमा शत्रुको पूर्ण पराजयले मोर्चाका अन्य महत्त्वपूर्ण क्षेत्रमा रुसी सेनाको थप सफल कार्यका लागि अवस्था सिर्जना गर्दछ र नवनाजी शासनको पराजयलाई नजिक ल्याउँछ ।
सरकारी सञ्चारमाध्यम तासका अनुसार रुसी राष्ट्रपतिले कुर्स्क क्षेत्रको मुक्तिमा भाग लिने सैन्य एकाइका सैनिकलाई बधाई र धन्यवाद दिनुभयो ।
रुसको उत्तर कोरियाली सेनाको स्वीकारोक्ति अमेरिका, दक्षिण कोरिया, बेलायत र युक्रेनले उत्तर कोरियाली सेना युद्धको मोर्चामा देखिएको लगभग एक वर्षपछि आएको हो । (रासस/एएनआई)
