ब्रसेल्स । फ्रान्सका राष्ट्रपति इमानुएल म्याक्रोँले रुससँगको युद्धमा सम्भावित युद्धविरामको योजनालाई अन्तिम रूप दिन युक्रेन समर्थकको गठबन्धनका नेताको अर्को हप्ता पेरिसमा पुनः बैठक हुने बताउनुभएको छ ।
ब्रसेल्समा इयूको शिखर सम्मेलनपछि म्याक्रोँले भन्नुभयो– ॅहामी आगामी बिहीबार पेरिसमा युक्रेनी राष्ट्रपति भोलोदिमिर जेलेन्स्कीको उपस्थितिमा गठबन्धनको इच्छुक सदस्यको अर्को बैठक गर्नेछौँ ।’
‘हामी युक्रेनी सेनाको लागि अल्पकालिक समर्थन र रुसी आक्रमण रोक्न युक्रेनको सशस्त्र बलको लागि दिगो मोडेलको रक्षा गर्न र युरोपेली सेनाले प्रदान गर्न सक्ने सुरक्षा ग्यारेन्टीमा हाम्रो कामलाई अन्तिम रूप दिनेछौँ’ उहाँले भन्नुभयो ।
उहाँले भन्नुभयो– ‘अबको केही दिनमै सम्पूर्ण प्रक्रियालाई अन्तिम रूप दिइनेछ ।’
अमेरिकी राष्ट्रपति डोनाल्ड ट्रम्पले गत महिना रुससँग प्रत्यक्ष वार्ता सुरु गरेदेखि नै म्याक्रोँले बेलायती प्रधानमन्त्री केइर स्टार्मरसँग मिलेर युक्रेनको समर्थनमा गठबन्धन बनाउने प्रयासको नेतृत्व गरिरहनुभएको छ ।
म्याक्रोँले भन्नुभयो– ‘युद्धविरामलाई समर्थन गर्ने तरिकाबारे हामीले बेलायतसँग धेरै काम गरेका छौँ । कुनै पनि युद्धविराम विश्वसनीय छ भनेर सुनिश्चित गर्न यो महत्त्वपूर्ण छ ।’
फ्रान्सेली नेताले भन्नुभयो– ‘यो छलफल गर्ने र सुधार गर्ने अवसर हुनेछ ।’
स्टार्मरले बिहीबार गठबन्धनमा चासो राख्ने राष्ट्रका करिब ३० जना वरिष्ठ सैन्य योजनाकारसँग वार्ताको आयोजना गर्दै युक्रेनका लागि सुरक्षा ग्यारेन्टीको राजनीतिक मनसाय वास्तविकता बनिरहेको बताउनुभएको थियो ।
बेलायती नेताले भन्नुभयो– ‘सीमाको रक्षाको सम्बन्धमा चाहे त्यो समुद्र वा आकाशमा के हुन सक्छ, ती योजना एकसाथ आउँदैछन् ।’
रुसी राष्ट्रपति भ्लादिमिर पुटिनले युक्रेनलाई पश्चिमी सैन्य सहायता बन्द गर्न माग गरेपछि उक्त समूहले के गर्न सक्छ भन्ने प्रश्न उठेको छ ।
स्टार्मर र म्याक्रोँ दुवैले आ–आफ्ना सेनालाई मैदानमा उतार्न तयार रहेको बताएका छन् ।
युक्रेनमा नेटो सैनिकको कुनै पनि उपस्थिति स्वीकार नगर्ने रुसले बताएको छ भने वासिङ्टनले जमिनमा सैनिक तैनाथ गर्नका लागि सुरक्षा सहायता गराउन इच्छुक हुने कुनै सङ्केत दिएको छैन । (रासस/एएफपी)
