वासिङटन । अमेरिकाका एक सङ्घीय न्यायाधीशले ट्रम्प प्रशासनलाई अमेरिकी अन्तर्राष्ट्रिय सहयोग नियोग (युएसएआइडी) बन्द गर्ने थप कदम चाल्न रोक लगाएका छन् ।
आफ्नो आदेशमा न्यायाधीश थिओडर छ्वाङले युएसएआइडी बन्द गर्ने प्रयासले अमेरिकी संविधानको उल्लङ्घन गर्न सक्ने जनाएका हुन ।
एलन मस्कको द डिपार्टमन्ट अफ गभर्मन्ट इफिसियन्सी (डज) ले अमेरिकी सहयोग निकाय बन्द गर्न लिएको निर्णय तत्काल रोक्न दिइएको उक्त आदेश विरुद्ध आफूले पुनरावेदन गर्ने अमेरिकी राष्ट्रपति ट्रम्पले बताएका छन् ।
अमेरिकी प्रसारक फक्स न्युजलाई दिएको अन्तर्वार्तामा ट्रम्पले छ्वाङजस्ता न्यायाधीश अमेरिकाका लागि राम्रो नभएको टिप्पणी गरेका छन् ।
गत हप्ता अमेरिकी विदेशमन्त्री मार्को रुबिओले विश्वभरि अमेरिकाको सहयोगमा सञ्चालित स्वास्थ्य र आपतकालीन सहयोगसम्बन्धी ८३ प्रतिशत कार्यक्रम रद्द गर्न लागिएको बताएका थिए ।
आफ्नो आदेशमा न्यायाधीश छ्वाङले ट्रम्पका साझेदार मस्कको नेतृत्वमा रहेको डजले युएसएआइडी बन्द गर्न गरिरहेको प्रयासले ॅएकभन्दा बढी कोणबाट’ अमेरिकी संविधानको उल्लङ्घन गरिरहेको हुन सक्ने उल्लेख गरे ।
उनले उक्त निकायलाई कर्मचारीलाई युएसएआइडीको कम्प्युटरमा पहुँच दिन र बिदामा राखिएका कर्मचारीलाई तलब उपलब्ध गराउन आदेश दिएका छन् ।
ती न्यायाधीशले युएसएआइडीका कर्मचारीको बर्खास्ती रोकिनुपर्ने आदेश पनि दिएका छन् तर उनले विगतमा बिदामा पठाइएका कर्मचारीलाई पुनर्बहाली गरिनुपर्ने आदेश भने दिएनन् ।
ज्यानुअरीमा ट्रम्प ह्वाइट हाउसमा प्रवेश गरेलगत्तै डीओजीईले यूएसएआईडीलाई निसाना बनाएको थियो। उक्त निकायले ९० दिनसम्मका लागि सबै अमेरिकाले दिँदै आएको वैदेशिक सहयोग स्थगित गर्न आदेश दिएको थियो । (बिबिसी)
