दोहा । अङ्गोलामा शान्तिवार्ता असफल भएको केही घण्टापछि रुवान्डा र प्रजातान्त्रिक गणतन्त्र कङ्गो (डिआरसी)) का राष्ट्रपतिले कतारमा आश्चर्यजनक वार्ता गरेर युद्धविरामका लागि आफ्नो समर्थन व्यक्त गर्नुभएको छ ।
रुवान्डाका राष्ट्रपति पल कागामे र कङ्गोका राष्ट्रपति फेलिक्स त्सेसेकेदीले मङ्गलबार कतारका अमिर शेख तमिम बिन हमाद अल थानीसँग भेटवार्ता गर्नुभएको थियो ।
रुवान्डा समर्थित एम–२३ सशस्त्र समूहले यस वर्षको सुरुमा कङ्गोको खनिजले समृद्ध पूर्वी क्षेत्रमा आक्रमण गरी दुई प्रमुख सहर कब्जा गरेको थियो ।
“राज्यप्रमुखले गत महिना अफ्रिकी शिखर सम्मेलनमा सहमति गरिएअनुसार तत्काल र बिनाशर्त युद्धविरामका लागि सबै पक्षको प्रतिबद्धता दोहोऱ्याउनुभयो” विज्ञप्तिमा भनिएको छ– “फलदायी बैठकले. प्रजातान्त्रिक गणतन्त्र कङ्गो र यस क्षेत्रको सुरक्षित र स्थिर भविष्यप्रति साझा प्रतिबद्धतामा विश्वास निर्माण गर्न मदत गऱ्यो ।”
मङ्गलबार राति रुवान्डाको राष्ट्रपति कार्यालयबाट जारी वक्तव्यले बैठक भएको पुष्टि गर्दै नेताहरूले पूर्वी कङ्गोमा द्वन्द्वका मूल कारण सम्बोधन गर्न सबै पक्षसँग प्रत्यक्ष राजनीतिक संवादको तत्काल आवश्यकताबारे छलफल गरेको बताएको छ ।
“राष्ट्रपति कागामेले सबै पक्ष मिलेर काम गर्दा सबै कुरा छिटो अगाडि बढ्न सक्ने विश्वास व्यक्त गर्नुभयो” विज्ञप्तिमा भनिएको छ ।
यसअघि मङ्गलबार अङ्गोलाले एम२३ समूहले अन्तिम समयमा फिर्ता लिएपछि शान्ति वार्ता रद्द भएको बताएको थियो ।
समूहले सोमबार विशेष गरी युरोपेली सङ्घ (इयु) ले लगाएको प्रतिबन्धलाई उल्लेख गर्दै केही अन्तर्राष्ट्रिय संस्थालाई जानाजानी शान्ति प्रयासलाई तोडफोड गरेको आरोप लगाएको थियो ।
इयुले पूर्वी कङ्गोमा सशस्त्र लडाकु र यसका प्रमुख बर्ट्रान्ड बिसिम्वासहित एम–२३ का वरिष्ठ सदस्यलाई समर्थन गरेकोमा तीन रुवान्डाली सैन्य कमान्डर र यसको खनन एजेन्सी प्रमुखलाई प्रतिबन्ध लगाएको छ ।
जनवरीदेखि कङ्गोली तुत्सीको हितको रक्षा गर्ने दाबी गर्ने एम–२३ ले गोमा र बुकाभुका प्रमुख सहरहरू अग्रिम गतिमा कब्जा गर्दा सात हजारभन्दा बढी मानिस मारिएका छन् । एएफपीले स्वतन्त्र रूपमा तथ्याङ्क प्रमाणित गर्न सकेको छैन ।
कङ्गो सरकार र एम–२३ ले अन्तिमपटक सन् २०१३ मा वार्ता गरेका थिए । (रासस/एएफपी)
