वासिङ्टन डिसी । रुस र युक्रेनको माझमा ३० दिने युद्धविराम सहमतिको प्रस्ताव गरिएको छ ।
अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनबिच युक्रेन युद्धबारे मार्च १८, २०२५ मङ्गलबार दुई घण्टा बढी भएको टेलिफोन वार्तामा सो सहमती भएको हो ।
वार्तामा ३० दिनका लागि युक्रेनका ऊर्जा तथा पूर्वाधारमाथि आक्रमण रोक्ने सहमति भएको ह्वाइट हाउसले जनाएको छ । यो सम्झौताले शान्ति स्थापनाको पहिलो चरणतर्फ सङ्केत गरे पनि युक्रेनले यस योजनामा साथ दिन्छ वा दिँदैन भन्ने अझै स्पष्ट भएको छैन ।
पुटिनले शान्तिवार्ताका लागि युक्रेनलाई विदेशी सैन्य सहायता पूर्ण रूपमा रोक्नुपर्ने शर्त अघि सार्नुभयो जबकि युक्रेनी राष्ट्रपति भ्लोडिमिर जेलेन्स्कीले पुटिनको प्रस्तावलाई ॅमात्रै कुरा गर्ने’ प्रयास भएको बताउनुभयो । ट्रम्पले रुससँग ॅकेही सम्पत्ति बाँडफाँट’ को विषयमा कुराकानी भइरहेको सङ्केत गरेपछि युरोपेली राष्ट्रहरू चिन्तित भएका छन् ।
वार्तापछि ट्रम्पले आफ्नो सामाजिक सञ्जालमा वार्ता महत्त्वपूर्ण चरणमा पुगेको बताउनुभयो तर अझै धेरै विषय टुङ्ग्याउन बाँकी रहेको उल्लेख गर्नुभयो ।
उता, पुटिनले आफ्नो सेना युक्रेनी भूभागमा निरन्तर अघि बढिरहेको दाबी गर्दै नेटो सेनालाई कुनै पनि हालतमा युक्रेनमा तैनाथ हुन नदिने अडान दोऱ्याउनुभयो ।
ह्वाइट हाउसमा ट्रम्पको पुनरागमनपछि युक्रेनमा अमेरिकी नीतिमा पूर्ण परिवर्तन आएको छ ।
अमेरिकी राष्ट्रपति ट्रम्पले गत महिना पुटिनसँग कुरा गरेको घोषणा गरेर विश्वलाई चकित पार्नुभएको थियो । यसले रुसी सेनाले युक्रेनमा आक्रमण जारी राखेसम्म रुसी राष्ट्रपतिलाई अलग्याउने पश्चिमी प्रयासलाई तोडेको थियो ।
त्यसयता उहाँले रुसी राष्ट्रपतिसँग धेरैपटक कुरा गर्नुभएको छ । पुटिनका लागि उहाँले विगतमा बारम्बार प्रशंसा व्यक्त गर्नुभएको थियो यद्यपि कुनै पनि वार्ताको औपचारिक रूपमा घोषणा गरिएको थिएन ।
ट्रम्पका विशेष दूत स्टिभ विटकफले संयुक्त युद्धविराम योजनाको विवरण प्रस्तुत गर्न गत बिहीबार मस्कोमा पुटिनसँग तीन घण्टा बैठक गर्नुभएको थियो । उक्त योजनाले युद्धमा ३० दिनको विरामको परिकल्पना गर्दछ तर वासिङ्टनको मस्कोसँगको सम्बन्ध सुधार हुँदा युक्रेनसँगको सम्बन्ध निकै जटिल बनेको छ ।
ट्रम्पको युक्रेनी राष्ट्रपति भ्लोदोमिर जेलेन्स्कीसँग फेब्रुअरी २८ मा ओभल अफिसमा विवाद भएको थियो । उक्त विवादका कारण अमेरिकाले किएभलाई दिने अर्बौं डलरको सैन्य सहयोग अस्थायी रूपमा निलम्बन गर्न पुग्यो ।
जेलेन्स्कीपछि युद्धविराम योजना र अमेरिकालाई युक्रेनको दुर्लभ खनिज भण्डारमा प्राथमिकताको पहुँच दिने सम्झौता दुवैमा सहमत हुन बाध्य हुनुभयो । (एजेन्सी)
