काठमाडौँ । अमेरिकाले कम्युनिस्टसित सम्बन्ध छ कि छैन भनी ३६ ओटा प्रश्न सोधेपछि संयुक्त राष्ट्र सङ्घले त्यसलाई तटस्थता र निस्पक्षतालाई होच्याएको प्रतिक्रिया दिएको छ ।
राष्ट्रसङ्घीय सहायता निकायले अमेरिकाले सोधेका प्रश्नावलीले तटस्थता र निष्पक्षताको आफूहरूको मूल सिद्धान्तलाई नै होच्याएको टिप्पणी गरेका हुन् ।
बिबिसीका अनुसार जटिल मानवीय कार्यमा काम गर्ने सहायता निकायले यसबारे खरो प्रतिक्रिया दिएका छन् ।
‘यो भनेको तपाईंले आफ्नो बच्चालाई पिट्न छोड्नुभयो हो कि होइन भनेर सोधिए जस्तै हो’ एक सहायता निकायका निराश कर्मचारीले भनेका छन् ।
अमेरिकाको अफिस मेनेजमेन्ट एन्ड बजेट (ओएमबी) ले ३६ ओटा प्रश्नसहित पठाएको पत्र पठाएको छ, त्यसमध्ये एउटा प्रश्न राष्ट्रसङ्घीय निकायको सम्बन्ध कम्युनिस्टसँग भए/नभएकोबारे छ ।
राष्ट्रसङ्घीय निकायलाई पठाइएको एउटा प्रश्नमा सोधिएको छ– “तपाईंको संस्था कम्युनिस्ट, समाजवादी वा अधिनायकवादी दलसम्बद्ध निकाय वा अमेरिका विरोधी आस्थालाई समर्थन गर्ने कुनै पनि पक्षसँग काम गर्दैन भन्ने तपाईंले निश्चित गर्न सक्नु हुन्छ ?”
त्यस्तै, अर्को प्रश्नमा चीन, रुस, क्युबा वा इरानबाट कुनै पनि कोष प्राप्त नगरेको पुष्टि गर्न भनिएको छ ।
यी देशहरू अमेरिकासँग मित्रवत् सम्बन्ध नभएका भए पनि राष्ट्र सङ्घका सबै १९३ देशजस्तै यी देशले पनि राष्ट्र सङ्घका मानवीय सहायता निकायलाई सहयोग गर्ने गरेका छन् ।
अर्को प्रश्न ती सहायता निकायले डिइआई अर्थात् विविधता, समानता र समावेशीकरण वा जलवायु परिवर्तनसँग सम्बन्धित कुनै पनि विषयमा परियोजना सञ्चालन गरे वा नगरेकोबारे छ ।
राष्ट्र सङ्घको मानव अधिकार निकायले अमेरिकाले पठाएको प्रश्नावलीको जबाफ नदिने बताएको छ ।
‘हामी राष्ट्र सङ्घका हकमा लागु नहुने र व्याख्या गर्ने ठाउँ नदिई हो वा होइन भनेर सोधिएका अनलाइन प्रश्नको उत्तर दिने अवस्थामा छैनौँ’ राष्ट्र सङ्घका एक जना प्रवक्ताले भनेका छन्– ॅयद्यपि हामी इमेलमार्फत् व्याख्यासहित हाम्रो जबाफ पठाउँछौ ।”
