इन्दमणि पाण्डे, बागलुङ ।
पञ्चायती कालरात्रीको विरुद्ध आवाज उठाउँदै न्याय, स्वतन्त्रता र समानताका निम्ति लड्दै गर्दा प्राणको आहुति दिनुभएका बागलुङ जिल्लाको प्रथम विद्यार्थी सहिद भूमिराज सापकोटाको स्मृतिदिवस आज मनाइएको छ ।
भूमिराज सापकोटाको फोटोमा अबिर तथा माल्यार्पणसँगै सुरु भएको कार्यक्रम अखिल (छैठौं) बागलुङको आयोजनामा भएको थियो । कार्यक्रममा बोल्दै राष्ट्रिय जनमोर्चा बागलुङका सल्लाहकार गौरीश्वर पाण्डेले अत्यन्तै निष्ठावान र देश र जनताप्रति समर्पित भूमिराज सापकोटाको सपना पूरा गर्न हरेक पार्टी कार्यकता आफैँमा जिम्मेवार र अनुशासित हुनुपर्नेमा जोड दिनुभयो ।
थप बोल्दै पाण्डेले लिपुलेक–लिम्पियाधुरालगायत ७१ स्थानमा भारतले सीमा अतिक्रमण गरेको भन्दै सबै नेपाली एकजुट भएर राष्ट्रियता बचाउन लाग्नुपर्ने बताउनुभयो ।
कार्यक्रममा बोल्दै अखिल नेपाल बुद्धिजीवी संघका केन्द्रीय सदस्य धनबहादुर कुँवरले सहिदको सपना पूरा गर्न र राष्ट्रियताको रक्षा गर्नका लागि सबैलाई आग्रह गर्नुभयो ।
कार्यक्रममा अखिल नेपाल महिला संघक बागलुङका सचिव केशकुमारी बुढा मगर, प्रगतिशील पत्रकार संघ बागलुङका उपाध्यक्ष लोकेन्द्र सुनारलगायतले मन्तव्य व्यक्त गर्नुभएको थियो भने शिक्षक प्रतिनिधि टिकाबहादुर पुनको समेत उपस्थिति रहेको थियो ।
कार्यक्रम अखिल (छैठौं) बागलुङका अध्यक्ष इन्द्रमणि पाण्डेको अध्यक्षतामा र कुलबहादुर छन्त्यालको सञ्लनमा सम्पन्न भएको थियो ।
