सन्धिखर्क । नेपालको संविधानले स्थानीय सरकारलाई दिएको २२ ओटा अधिकारलाई प्रयोग र अभ्यास गर्न स्थानीय तहको समाधान गर्न सक्ने विषय तथा पालिकामार्फत केन्द्रीय सरकारलाई ध्यानाकर्षण गराउन राष्ट्रिय जनमोर्चा सन्धिखर्क नगर समितिले पालिकामा १५ बुँदे ज्ञापनपत्र बुझाएको छ ।
२०८१ भदौ ११ गते मङ्गलबार नगरप्रमुख कृष्णप्रसाद श्रेष्ठलाई भेटी राजमोले सो ज्ञापन बुझाएको हो ।
ज्ञापनमा नेपालको राष्ट्रियता, सार्वभौमसत्ता र अखण्डताको रक्षाका लागि नेपाल–भारतबिच भएको सन् १९५० को असमान सन्धि, विभिन्न राष्ट्रघाती सन्धिसम्झौता खारेजी, कालापानीमा भारतीय सेनाको कब्जा, भारतद्वारा नेपालको भूमिमा भइरहेको अतिक्रमण र अमेरिकाले नेपालमाथि लादेको एमसिसीलगायतको बारेमा उल्लेख छ ।
त्यसैगरी, पालिकाभित्र आइपरेका समस्याहरू; जस्तै : पालिकामा बढिरहेको बेरुजु, अनुत्पादक क्षेत्रमा भइरहेको खर्च नियन्त्रण, शैक्षिक क्षेत्रमा गुणस्तर वृद्धि गरी उपयोगी शिक्षा र स्वरोजगारका लागि पालिकाको भूमिका, सहकारी दर्ता तथा नियमन र अनुगमन, सार्वजनिक सवारी यातायातमा मनपर्दी ढङ्गबाट असुली गर्ने भाडामाथि रोक, अव्यवस्थित व्यवसाय, पसलमार्फत हुने कालोबजारी, बढ्दो महङ्गी र विचौलियातन्त्रको अन्त्य, बजार नियमित अनुगमन, किसानको उत्पादनको वास्तविक मूल्य र किसानलाई आवश्यक कृषिसामग्री मल, बिउ, विषादी तथा प्रविधिबारे पालिकाको ध्यानाकर्षण गराइएको छ ।
एवम् प्रकारले पालिकाभित्र स्वास्थ्य संस्थामा साधनश्रोत, योग्य र अनुभवी डाक्टर, महामारी फैलिएमा आवश्यक पर्ने सामग्री खरिद तथा भौतिक पूर्वाधारको निर्माण, पालिकाबाट गरेका विकास निर्माणका काममा दिगो र जनमुखी बनाउन नियमित अनुगमन, प्राकृतिक विपत्तिबाट क्षति कम गर्न आवश्यक योजना र बिपत् व्यवस्थापन समितिको तयारी, खेतियोग्य उर्वर जमिनलाई उत्पादन क्षेत्रको रूपमा उपयोग, सार्वजनिक, प्राकृतिक, सांस्कृतिक सम्पदा र पर्यावरणसँगै वातावरणीय स्वच्छताको निम्ति आवश्यक कार्ययोजना जस्ता विषयमा ध्यान आकर्षण गराइएको छ ।
राजमो लुम्बिनी प्रदेश समितिका सल्लाहकार शेरबहादुर बिसीको नेतृत्वमा सो प्रतिनिधिमण्डल नगर कार्यपालिका पुगेको थियो ।
प्रतिनिधिमण्डलमा केन्द्रीय सदस्य यमलाल पोख्रेल, अखिल नेपाल जनजाति सम्मेलनकी सचिव उषा पुन, नेकपा (मसाल) का जिल्ला प्रवक्ता पशुपति ढकाल, राजमो जिल्ला उपाध्यक्ष गोपाल पौडेल, जिल्ला सचिवालय सदस्य भीमलाल आचार्य, राजमो जिल्ला सदस्यहरू रुद्र पराजुली, दिलदार हुसेन, निमिराज भट्टराई, राजमो सन्धिखर्कका अध्यक्ष गोविन्द बिसी, राजमो नगर कोषाध्यक्ष लीला भुसाल, राजमो नेता सिद्धिप्रसाद भट्टराई, राजमो नगर सहसचिव वसन्त खड्का, नगर सदस्य शालिकराम बन्जाडे र देविप्रसाद पौडेल, कृष्ण खनाल, राधा आचार्य, अखिल नेपाल महिला सङ्घकी जिल्ला कोषाध्यक्ष मीना बिसी, महिला सङ्घकी नगर सदस्य शान्तिदेवी पौडेल, जनजाति सम्मेलनका जिल्ला अध्यक्ष जनक पुन र अखिल नेपाल युवक सङ्घका जिल्ला कोषाध्यक्ष भ्रपाल बिसी सहभागी हुनुहुन्थ्यो ।
ज्ञापनपत्र राजमो जिल्ला सचिवालय सदस्य वाचन कमल प्रसाद घिमिरेले गर्नुभएको थियो ।
