काठमाडौँ । अर्घाखाँचीको भूमिकास्थानस्थित चुनढुङ्गा उत्खनन् प्रकरणमा दोषीलाई उम्किन नदिन र निर्दोषलाई नफसाउन प्रहरी प्रशासनसित राष्ट्रिय जनमोर्चाले जोड दिएको छ ।
अध्यक्ष चित्रबहादुर केसीको हस्ताक्षरमा २०८१ भदौ २ गते आइतबार प्रेसवक्तव्य जारी गर्दै पार्टीले सो तथ्यमा जोड दिएको हो ।
जिल्लाको भूमिकास्थान नगरपालिका–९ स्थित चुनढुङ्गा उत्खनन्का लागि पालिकाको कीर्ते लेटरप्याड र नगरप्रमुखको हस्ताक्षरको प्रयोगबारे राजमोले सो वक्तव्य जारी गरेको छ ।
कैयौँ जिल्लाहरूमा सत्तारूढ दलले विरोधी पार्टीका विरुद्ध पुलिस प्रशासनलाई उपयोग गर्ने गरेको बताउँदै सो वक्तव्यमा अर्घाखाँचीमा त्यस्तो भएमा त्यसबाट उत्पन्न परिस्थितिको जिम्मेवार स्वयम् सरकार हुने बताइएको छ ।
यस्तो छ, प्रेसवक्तव्यको पूर्ण पाठ :
“अर्घाखाँची जिल्ला भूमिकास्थान नगरपालिका वडा नं. ९ मा स्थित चुनढुङ्गा उत्खनन् कम्पनी सञ्चालनका लागि अनुमति लिने नाममा कम्पनीको प्रतिनिधिले भूमिकास्थान नगरपालिकाको लेटरप्याड तथा नगरप्रमुखको हस्ताक्षर कीर्ते प्रकरणमा दोषीउपर कारबाही गरिनुपर्ने कुरामा हाम्रो पार्टीबाट पहिले नै वक्तव्य सार्वजनिक भइसकेको छ । प्रहरी प्रशासनले कीर्ते प्रकरणमा छानबिन गरी सम्बन्धित कम्पनीका प्रतिनिधिलाई हिरासतमा लिएर मुद्दाप्रक्रिया अगाडि बढाएको छ । त्यसलाई हामीले समर्थन गर्दछौँ । चुनढुङ्गा उत्खनन् अनुमतिसँग जोडिएको कीर्ते प्रकरणमा दोषी उम्किन नदिन तथा निर्दोष नफसुन् भन्नेतर्फ प्रहरी प्रशासनले पूरा ध्यान दिनुपर्दछ भन्ने हाम्रो दलको जोड छ तर त्यसका साथै विगतमा देशका कैयौँ जिल्लामा प्रहरी प्रशासनले सत्तारूढ दलको निर्देशन वा रुचिमा निर्दोष व्यक्तिलाई फसाउने वा मुद्दा लगाउने गरेका थुप्रै उदाहरण पनि रहेका छन् । विपक्षीको सङ्गठनलाई नोक्सान पुर्याउन तथा सत्तारूढ दलको सङ्गठन विस्तारमा प्रहरी प्रशासनलाई सत्तारूढ दलले प्रयोग गर्ने गरेका छन् ।
सत्तारूढ दलको स्वार्थमा प्रहरी प्रशासन चुनढुङ्गा उत्खनन् अनुमति कीर्ते प्रकरणलाई हाम्रा विरुद्ध उपयोग गर्न नपाउन् भन्नेतर्फ पनि हाम्रो दलको ध्यान गएको छ तर कीर्ते प्रकरणमा घटनाक्रमको जसरी विकास भइरहेको छ, त्यसलाई हेर्दा त्यो प्रकरणलाई सत्तारूढ दलले हाम्रो सङ्गठनका विरुद्ध प्रयोग गरिरहेको त छैन भन्ने शङ्का उत्पन्न भएको छ । यदि प्रहरी प्रशासनले कीर्ते प्रकरणलाई हाम्रो सङ्गठनका विरुद्ध प्रयोग गर्न खोजेमा त्यसबाट उत्पन्न हुने परिस्थितिको जिम्मेवारी स्वयम् सरकार हुने छ ।
अन्तमा चुनढुङ्गा उत्खनन् कार्यले स्थानीय खानेपानीका मूल, वनजङ्गल, जनताको खानेपानी, कृषिमा गम्भीर असर पुग्ने तथा खानी उत्खनन्को परिणाम त्यहाँको बस्तीलाई विस्थापित गर्नुपर्ने र त्यसबाट पर्यावरणलाई पनि गम्भीर असर पुग्ने भएकाले हाम्रो दलले चुनढुङ्गा उत्खनन् कार्य सञ्चालन गर्न नदिन विगतदेखि नै अडान लिँदै आएको छ । त्यस सवालमा हाम्रो अडान अहिले पनि कायम नै छ ।”
