खलङ्गा । राष्ट्रिय जनमोर्चाकी सदस्य मिठादेवि रसाइलीको स्मृतिमा शोकसभा सम्पन्न भएको छ ।
रसाइलीको निधन भएको नवौँ दिन राजमो झिमरुक–७ वडा समितिको आयोजनामा २०८१ साउन ३१ गते बिहीबार उक्त कार्यक्रम सम्पन्न भएको हो ।
स्मृतिशेष रसाइलीका पति मूल प्रवाह अखिल भारत नेपाली एकता समाज हनुमानगढ नगर समितिका सदस्य विष्णुबहादुर रसाइलीको अध्यक्षतामा प्रारम्भ भएको सो कार्यक्रम सञ्चालन राजमो वडा समितिका सचिव केबी सुनारले गर्नुभएको थियो ।
मृतकप्रति एक मिनेट मौनधारणपछि शोक मन्तव्य राख्नेहरूमा राजमो केन्द्रीय सदस्य नारायण जिसी, अखिल नेपाल शिक्षक सङ्घका गोरबहादुर विक र जिल्ला समन्वय समिति प्युठानका सदस्य तथा रक्तिम जिल्ला उपाध्यक्ष रेकम रसाइली हुनुहुन्थ्यो ।
कार्यक्रममा पूर्व वडासदस्य प्रेम रसाइली पनि उपस्थित हुनुहुन्थ्यो ।
शोकसभामा राजमो झिमरुक–७ वडा समितिको निर्णयअनुसार “मिठा रसाइली बचाऊ अभियान” मा सङ्कलन गरिएको बाइस हजार एक सय रुपियाँ राजमो केन्द्रीय सदस्य जिसीले मृतकका पति रसाइलीलाई हस्तान्तरण गर्नुभएको थियो ।
कार्यक्रममा सो अभियानमा हातेमालो गर्ने सबैलाई धन्यवाद दिँदै शोकसभाका अध्यक्षले कार्यक्रम समापन गर्नुभएको थियो ।
शोकसभामा राजमो झिमरुक–७ को वडासमितिल स्मृतिशेष रसाइलीप्रति भावपूर्ण श्रद्धाञ्जली तथा शोकसन्तप्त परिवारजनमा गहिरो समवेदना प्रकट गरेको सूचनामा उल्लेख छ ।
