खलङ्गा । अखिल नेपाल जनजाति सम्मेलन लुम्बिनी प्रदेश समितिको दोस्रो प्रदेश भेला तथा प्रशिक्षण कार्यक्रम सम्पन्न भएको छ ।
२०८१ साल जेठ ३२ र असार १ गते दुई दिन जनजाति सम्मेलनका केन्द्रीय अध्यक्ष निमबहादुर बुढाथोकीको प्रमुख आतिथ्यमा प्युठानको खलङ्गामा उक्त कार्यक्रम सम्पन्न भएको हो ।
दुई दिनसम्म चलेको सो कार्यक्रममा अध्यक्ष बुढाथोकी, अखिल नेपाल बुद्धिजीवी सङ्घका सचिवालय सदस्य दुर्गानाथ खरेल र राष्ट्रिय जनमोर्चा लुम्बिनी प्रदेश सल्लाहकार सुरेश थापाले प्रशिक्षण दिनुभएको थियो ।
त्यस क्रममा मार्क्सवादी दर्शन, तात्कालिक राजनीति, सङ्गठनात्मक सिद्धान्त, जनजातिको समस्या तथा समाधानलगायतका विषयमा प्रशिक्षण दिइएको महासचिव रानामगरले जानकारी दिनुभयो ।
उद्घाटन शत्रमा लुम्बिनी प्रदेशका संयोजक उषा पुनको अध्यक्षता तथा जनजाति सम्मेलनकै महासचिव अमरध्वज रानामगरको सञ्चालन रहेको थियो ।
सो अवसरमा राजमो केन्द्रीय सदस्य कृष्णबहादुर खड्का, नेकपा (मसाल) का लुम्बिनी प्रदेश प्रवक्ता तिलक जिसीलगायतले मन्तव्य राख्नुभएको थियो ।
प्रशिक्षण कार्यक्रममा लुम्बिनी प्रदेशका सबै जिल्लाबाट सहभागिता रहेको आयोजकले जनाएको छ ।
