ढोरपाटन (बागलुङ) । राष्ट्रिय गौरवको आयोजना मध्यपहाडी लोकमार्गको बागलुङ–घोडाबाँधे सडक यस वर्ष पनि कालोपत्र नहुने भएको छ ।

२६ वर्ष अगाडि र्ट्याक खुलेको लोकमार्ग कालोपत्र गर्न झन्डै एक दशकअगाडि निर्माण कम्पनीलाई जिम्मा दिइएकोमा काम नगर्दा चालु आर्थिक वर्षमा पनि नसकिने भएको हो ।

कालोपत्र गर्न दुई खण्डमा गरी ठेक्का लगाइएको थियो । बागलुङ नगरपालिका–४ उपल्लाचौरबाट काठेखोला गाउँपालिका–५ इनारपानी घुम्तीसम्मको पहिलो खण्डमा ८० प्रतिशत र इनारपानी घुम्ती भन्दामाथि घोडाबाँधेसम्मको दोस्रो खण्डमा ७४ प्रतिशत मात्रै काम भएको मध्यपहाडी लोकमार्ग कार्यालय पर्वतले जनाएको छ ।

दोस्रो खण्ड इनारपानी घुम्तीबाट घोडाबाँधेसम्मको ठेक्का पाएको निर्माण कम्पनी काम नगरेर कालो सूचीमा परेपछि सडक अलपत्र परेको छ भने पहिलो खण्डमा निर्माण कम्पनीले सुस्त गतिमा काम गरिरहेको सूचना अधिकारी इन्जिनियर धीरज ढकालले जानकारी दिनुभयो ।

पहिलो खण्ड उपल्लाचौरबाट १३ किलोमिटर सडकको भारत/सिद्धिसाई जेभीसँग २०७३ माघमा दुई वर्षमा सक्ने गरी सम्झौता गरिएको थियो । अहिलेसम्म पाँचपटक म्याद थप गर्दा सात किमि सडक मात्रै कालोपत्र गरेको छ भने अझै छ किमि रहेको उहाँको भनाइ छ । इन्जिनियर ढकालका अनुसार यस खण्ड चालु आर्थिक वर्षमा नसकिने भएपछि निर्माण कम्पनीले आगामी पुस मसान्तसम्म सक्ने गरी म्याद थप गरेको छ ।

दोस्रो खण्ड २०७२ माघमा जिम्मा पाएको एमपी/एससीएफ/ई सिसी जेभी गत पुसमा सूचीमा परेको थियो । तीन वर्षमा निर्माण सम्पन्न गर्ने गरी सम्झौता गरे पनि नौ वर्षसम्म काम नगर्दा सार्वजनिक खरिद अनुगमन कार्यालयले कालोसूचीमा राखेको थियो ।

काठेखोला गाउँपालिकाको बिहुँबाट घोडाबाँधेसम्म १२ किमि सडक एमपी सितानी एन्ड सन्स पश्चिम बङ्गाल भारत सूर्य कन्स्ट्रक्सन फर्म सुर्खेत र एलिट कन्स्ट्रक्सन प्रालि सुकेधारा काठमाडौँले संयुक्त रूपमा ठेक्का लिएका थिए । यस खण्डका लागि अर्थ मन्त्रालयले गत फागुनमा रु ३३ करोड स्रोत सुनिश्चित गरेको थियो ।

अहिले उक्त खण्डको ठेक्का प्रक्रिया अगाडि बढाउन प्राविधिक मूल्याङ्कनको काम भइरहेको इन्जिनियर ढकालले बताउनुभयो । उहाँले यस वर्षको बर्खा लाग्न सुरु भएकाले कालोपत्रको काम नहुने बताउनुभयो । कालोपत्र गर्न बर्खामा नमिल्ने हुँदा असोजपछि मात्रै काम हुने उहाँको भनाइ छ ।

पहिलो खण्डको काम सम्पन्न गर्न सुरुमा रु ३९ करोड ७१ लाखमा सम्झौता गरेकोमा उक्त लागत बढेर रु ४३ करोड ६५ लाख पुगेको इन्जिनियर ढकालले जानकारी दिनुभयो । अहिले निर्माण कम्पनीले काम गरे पनि अपेक्षाअनुसार गर्न नसकेको उहाँको भनाइ छ ।
हालसम्म पाँचौँपटक म्याद थप गरेको हुँदा आगामी पुस मसान्तसम्म जसरी पनि सक्नुपर्ने भन्दै दबाब दिएको इन्जिनियर ढकालले बताउनुभयो । उहाँका अनुसार यस खण्डमा २० प्रतिशत मात्रै काम गर्न बाँकी छ ।

‘पहिलो खण्डअन्तर्गत उपल्लाचौरबाट कोपिला घुम्तीसम्मको काम भइरहे पनि अपेक्षाअनुसार भएको छैन । यी दुई खण्डकै काम धेरै अगाडि सकिनुपर्ने हो तर निर्माण कम्पनीको लापरबाहीले अहिलेसम्म सकिन सकेको छैन’ इन्जिनियर ढकालले भन्नुभयो– ‘पहिलो खण्ड ८० र दोस्रो ७४ प्रतिशत मात्रै काम भएको छ, दोस्रो खण्डको केही दिनमै ठेक्का प्रक्रिया अगाडि बढ्ने छ ।’

लोकमार्ग खुलेको डेढ दशक बित्दा पनि कालोपत्र नहुँदा स्थानीयवासीले सास्ती खेप्नुपरेको काठेखोला–५ का नन्दप्रसाद कँडेलले बताउनुभयो । बर्खामा हिलो र हिउँदमा धुलोका कारण सडक छेउछाउका बस्ती नै विस्थापित हुनुपरेको उहाँले गुनासो पोख्नुभयो ।

हिउँदमा सडकको धुलोले घरै पुरिने हुँदा स्थानीयले घर सम्पत्ति छोडेर भाग्नु परेको कँडेलको भनाइ छ । राज्यले काम नगर्ने ठेकेदारलाई कारबाही नगर्दा यो स्थिति आएको उहाँले बताउनुभयो । (रासस)