धनगढी । नेकपा (मसाल) को नवौँ महाधिवेशनको घोषणासभा सुदूरपश्चिमको कैलाली र कञ्चनपुरमा पनि सम्पन्न भएको छ ।

१३५ औँ अन्तर्राष्ट्रिय मजदुर दिवसको अवसरमा बुधबार दुवै जिल्लामा नेकपा (मसाल) जिल्ला समितिले ऐतिहासिक तीन अभियानको समापनसँगै नवौँ महाधिवेशन घोषणा सभाको आयोजना गरेका हुन् ।

नेकपा (मसाल) कैलाली जिल्ला समितिले धनगढीमा आयोजना गरेको घोषणा सभामा राष्ट्रिय जनमोर्चाका केन्द्रीय सदस्य नन्दराज भट्टले नवौँ महाधिवेशनको अवधारणा पत्र पढेर सुनाउनुभएको थियो ।

मसालका पूर्वजिल्ला प्रवक्ता मिलन शाहीको अध्यक्षतामा भएको कार्यक्रममा राजमो राष्ट्रिय परिषद सदस्य हरिकृष्ण पाण्डे, कैलाली जिल्ला अध्यक्ष जगत जोशी, डोटी जिल्ला अध्यक्ष डबल बोगटी, कालिकोटका सचिव देविदास सञ्ज्याल, जनजाती नेता खडक राना, अखिल नेपाल महिला संघकी अञ्जना मास्के, किसान संघका शेरबहादुर विष्ट, ट्रेड युनियनका रामकिसन राना र बुद्धिजीवि संघका शोभामणि भट्टले आ–आफ्नो धारणा राख्नुभएको थियो ।

राजमो जिल्ला सचिव मेजरजंग शाहीले सञ्चालन गरेको कार्यक्रममा रक्तिमका केन्द्रीय उपाध्यक्ष बाबुराम आचार्यले स्वागत गर्नुभएको थियो ।

यता, कञ्चनपुरमा पनि नेकपा (मसाल) को आयोजनामा पनि पार्टीको नवौँ महाधिवेशन घोषणा सभा सम्पन्न भएको छ ।

राजमो केन्द्रीय सदस्य मञ्जु परियारको अध्यक्षता तथा जिल्ला सचिव लालबहादुर कुँवरको सञ्चालनमा सम्पन्न कार्यक्रममा ट्रेड युनियनका सुदूरपश्चिम प्रदेश संयोजक जनक कुँवरले अवधारणा पत्र प्रस्तुत गर्नुभएको थियो । कार्यक्रममा तराई मधेश जनवादी मोर्चाका महासचिव राजाराम चौधरीले आफ्नो धारणा राख्नुभएको थियो ।