काठमाडौं । मोहन वैद्य नेतृत्वको नेकपा (क्रान्तिकारी माओवादी) सँग मिसिन मोटो मशालका विभिन्न जिल्ला समितिहरूले अस्वीकार गरेका छन् ।
शुक्रबार नेकपा (मशाल) दाङ जिल्ला समितिले एकतामा नजाने घोषणा गरेलगत्तै तनहुँ जिल्ला समितिले पनि सोही प्रकृतिको विज्ञप्ति जारी गर्दै मोहन वैद्यको पार्टीसँग मिसिन नहुने स्पष्ट पारेको छ ।
तनहुँ जिल्ला सचिव नरबहादुर थापाद्वारा जारी विज्ञप्तिमा ‘सिद्धान्तविहीन र राष्ट्रिय विखण्डनको नीतिलाई समर्थन गरी क्रान्तिकारी माओवादीसँग पार्टी एकताको निर्णय गरेको’ आरोप लगाइएको छ ।
साथै, राष्ट्रिय भेलामा नै तनहुँ जिल्ला समितिको निर्णय स्पष्टसँग राखेको उल्लेख गर्दै सो एकतामा सामेल नहुन देश विदेशमा रहेका पार्टी सदस्यहरूसँग आह्वान गरिएको छ ।
यसअघि नेकपा (मशाल) दाङ जिल्ला समितिले शुक्रबार नै विज्ञप्ति प्रकाशित गरी सिद्धान्तहीन एकतामा सामेल नहुन कार्यकर्ता पंक्तिसित आग्रह गरेको थियो ।
‘सैद्धान्तिक रूपमा पथ प्रदर्शक सिद्धान्तको रूपमा माओवाद वा विचारधारा के मान्ने, दशवर्षे सशस्त्र द्वन्दलाई उग्रवामपन्थी गल्ती भन्ने वा नभन्ने, नेपाललाई एकात्मक राज्य मान्ने कि बहुराष्ट्र साथै क्रान्तिकारी कम्युनिस्ट पार्टी नेपालले मानेको संघीयताको विषयमा जातिय पहिचानसहित पृथक हुन पाउने आत्मनिर्णयको अधिकारबारे गम्भीर विवाद थिए’ भन्दै मशालका तल्ला समितिहरुले यस प्रकारको सिद्धान्तहीन तरिकाको पार्टी एकता गर्न नहुनेमा जोड दिएका हुन् ।
नेकपा (क्रान्तिकारी माओवादी) र मोटो मशालबीच यही वैशाख १९ गते पार्टी एकता हुँदैछ ।
