खिमराज चालिसे, चन्डिगढ (भारत) ।
भारतको हिमाचल प्रदेशस्थित रिकाङपियोमा मूल प्रवाह अखिल भारत नेपाली एकता समाजलाई नगर कार्यालयका लागि एउटा कोठा दिइने भएको छ ।
जनवरी ३, २०२४ बुधबारका दिन मूल प्रवाहको प्रतिनिधिमण्डलसित कुराकानी गर्दै हिमाचल प्रदेश सरकारका राजस्व, बागवानी एवम् जनजातीय विकास मन्त्री जगत्सिंह नेगीको निर्देशनपछि सरकारी निकाय रिकाङपियो कर्पोरेसनले साडा कप्लेक्समा एउटा कोठा मूल प्रवाहका लागि दिने भएको हो ।
मन्त्री नेगीले ज्ञापनपत्र बुझाउन आएको मूल प्रवाहको प्रतिनिधिमण्डलसामु नै स्थानीय अधिकारीलाई निर्देशन जारी गर्नुभएको थियो ।
ज्ञापन बुझाउनका लागि मूल प्रवाहका हिमाचल प्रदेश समितिका सहसचिव मिथुन सिंह, रिकाङपियो नगर समितिका उपाध्यक्ष गोपालजङ्ग शाही, सहसचिव रणबहादुर तामाङ, कोषाध्यक्ष निर्मल, सदस्यहरू चारा चन्द, रतन, राम, नरेन्द्रसहितको प्रतिनिधिमण्डल मन्त्रालय पुगेको थियो ।
प्रतिनिधिमण्डलले रिकाङपियोमा असामाजिक गतिविधि रोक्न प्रशासनलाई मूल प्रवाहले सहयोग गर्ने वचन दिँदै त्यहाँ लेबरचोक निर्माण गर्न सरकारसित आग्रह गरेको थियो ।
