कोलम्बो । श्रीलङ्काको आगामी पाँच दिनसम्म वित्तीय बजार बन्द गर्ने भएको छ ।
५१ अर्ब अमेरिकी डलर बढीको आन्तरिक ऋणको पुनर्संरचना गर्ने विवादास्पद कदम चाल्नुअघि श्रीलङ्काले सो घोषणा गरेको हो ।
श्रीलङ्काले गत वर्षको अप्रिलमा आर्थिक सङ्कट घोषणा गर्दै आफ्नो विदेशी ऋणको लागि सम्झौता गरेको कानुनी दायित्व पूरा गर्न नसकेपछि मार्चमा सहमति भएको अन्तर्राष्ट्रिय मुद्र्रा कोष (आइएमएफ) को बेलआउट प्याकेजअनुरूप पुनर्संरचनाले सरकारी ऋणपत्रलाई असर गरेको बताइएको छ ।
उहाँले स्थानीय टेलिभिजन नेटवर्कसँग भन्नुभयो– ‘ऋण पुनर्संरचनाको बारेमा संसद्मा छलफल भइरहेको बेला बजार खुला रहनु अस्वस्थकर हुने छ ।’
उहाँका अनुसार आगामी पाँच दिनभित्र पुनर्संरचनाको प्रक्रिया पूरा हुने छ ।
‘यो निर्णयले व्यक्तिको निक्षेपमा कुनै असर पर्ने छैन तर वाणिज्य बैङ्क र पेन्सन फन्डको ट्रेजरी बिल र ऋणपत्रको पुनर्संरचना गर्ने सरकारको योजना छ’ उहाँले भन्नुभयो ।
चार वर्षे २.९ अर्ब अमेरिकी डलरको आइएमएफ उद्धार प्याकेजलाई निरन्तरता दिन सरकारले आफ्ना विदेशी ऋणदातासँग बाह्य ऋणको पुनर्संरचनाका लागि वार्ता गरिरहेको छ ।
सरकारले गत अगस्टसम्ममा बैदेसिक ऋण पुनर्संरचनाको अपेक्षा गरेको थियो तर देशको मुख्य द्विपक्षीय ऋणदाता चीनले सुरुमा कटौति गर्न अनिच्छुक भएको र यसको सट्टा पुरानो ऋण तिर्न थप कर्जा प्रस्ताव गरेको थियो ।
श्रीलङ्काले कुल बैदेसिक ऋणको १४ अर्ब डलरभन्दा बढी विदेशी सरकारको द्विपक्षीय ऋण छ भने यसको ५२ प्रतिशत चीनलाई तिर्नुपर्छ ।
आइएमएफको शर्तअनुसार सरकारले आफ्नो खातालाई सन्तुलित बनाउन र टापु राष्ट्रको सबैभन्दा खराब आर्थिक सङ्कटबाट बाहिर निस्कनका लागि आफ्नो आन्तरिक र विदेशी ऋण सेवालाई आधाभन्दा बढी घटाउनुपर्छ । (रासस/एएफपी)
