नेपालगन्ज । अखिल नेपाल किसान महासङ्घ (अप्फा) का महासचिव तुलसिराम सापकोटाले हालसम्मका शासकहरूले नेपाली किसानको पक्षमा काम नगरेको आरोप लगाउनुभएको छ ।
अखिल नेपाल किसान महासङ्घ (अप्फा) बाँकेको आयोजनामा आमसभा २०८० वैशाख ३० गते शनिवार बाँकेको डुडुवा–२ बेतहनीमा आयोजित आमसभामा मन्तव्य राख्दै उहाँले यसतो अभिव्यक्ति दिनुभएको हो ।
प्रमुख अतिथिको रूपमा कार्यक्रमलाई सम्बोधन गर्दै उहाँले हालसम्मका शासकले किसानका पक्षमा काम नगरेकाले जलश्रोतको धनी देशमा पनि सिँचाइको सुविधा नभएको बताउनुभयो ।
‘हाम्रो देश जलश्रोतमा धनी छ’ उहाँले अगाडि भन्नुभयो– ‘तर शासक वर्गको नालायकीका कारण सिँचायको अभावमा देशमा कृषि उत्पादन राष्ट्रिय आत्मनिर्भरताको हिसाबले धेरै नै कमजोर छ ।
उहाँले नेपालको हकमा यस्तो समस्या देखिनु दुखलाग्दो कुरा भएको पनि बताउनुभयो ।
सरकारको यस खालको भूमिका रहेका कारण नेपाली किसानमाथिको शोषण, दमन अन्त्य गर्न तथा आफ्नो अधिकारप्राप्तिका लागि किसानहरू स्वयम् सङ्गठित भई सङ्घर्ष गर्नुपर्ने आवश्यकतामा उहाँले जोड दिनुभयो ।
फरक प्रसङ्गमा सरकारको नेतृत्वमा रहेका व्यक्तिहरूबाटै नेपालीलाई नक्कली भुटानी शरणार्थी बनाई लाखौँ असुल्ने गरेको घटना राष्ट्रका लागि अत्यन्त लाजमर्दो भएकाले निष्पक्ष छानबिन गरी दोषीमाथि कडा कारबाही हुनुपर्ने उहाँले बताउनुभयो ।
आमसभामा राष्ट्रिय जनमोर्चा बाँकेका उपाध्यक्ष जगदीश ढकाल, अप्फा बाँकेका संयोजक तिलकराज पौडेललगायतले मन्तव्य राख्नुभएको थियो ।
सो अवसरमा अखिल नेपाल राष्ट्रिय उद्योग व्यापार सङ्घका केन्द्रीय सदस्य पर्शुराम लामिछाने, जातीय समता समाज बाँकेका उपाध्यक्ष ऋषिराम विक, अखिल नेपाल युवक सङ्घ बाँकेका सदस्य खगेन्द्र खत्रीलगायतको आतिथ्य रहेकोे थियोे ।
अप्फाको डुडुवा–२ वडा समितिका अध्यक्ष रामखेलावन लोनियाको अध्यक्षतामा अघि बढेको सो कार्यक्रम अखिल (छैठौँ) बाँकेका अध्यक्ष नमराज चन्दको सञ्चालनमा सम्पन्न भएको थियोे ।
