कुवेत । नेपाली राजदूतावास कुवेतले हाल जारी राहदानी आवेदन प्रक्रिया स्थगित भएको जनाएको छ ।
विद्युतीय राहदानी (ई–पासपोर्ट) जारी गर्नुपर्ने भएकोले तीन हप्ताका लागि सेवा स्थगित गरिएको दूतावासले बिहिबार सूचना जारी गरेर स्पष्ट पारेको हो ।
‘नेपाल सरकारले अत्याधुनिक प्रविधिमा आधारित विद्युतीय राहदानी (ई–पासपोर्ट) क्रमिक रुपमा जारी गर्दै जाने क्रममा निकट भविश्यमा नै यस राजदूतावसबाट पनि उक्त सुविधा उपलब्ध गराइन लागेको व्यहोरा सबैमा सहर्ष जानकारी गराईन्छ’ दूतावासले जारी गरेको सूचनामा भनिएको छ, ‘यसै क्रममा गर्नु पर्ने आवश्यक तयारीका लागि हाल चालू रहेको राहदानी आवेदन प्रक्रिया स्थगित राख्नु पर्ने भएकोले आगामी तीन हप्ताका लागि सो सेवा बन्द गरिएको व्यहोरा जानकारी गराइएको छ ।’
साथै दूतावासले अत्यन्त जरुरी कारण, जस्तैः तुरुन्तै यात्रा गर्नुपर्ने र सिभिल आईडी नवीकरण गर्नुपर्ने भई तत्काल राहदानी आवश्यक पर्ने व्यक्तिले आपतकालीन वैकल्पिक व्यवस्थाका लागि दूतावासको हटलाइन वा इमेल मार्फत सम्पर्क गरी समय लिएर आउन पनि अनुरोध गरेको छ ।
