बेल रजाली मगर,जयपुर ।
मूल प्रवाह अखिल भारत नेपाली एकता समाजका महासचिव ठाकुर खनालले मूल प्रवाहले कसैप्रति पूर्वाग्रह नराख्ने स्पष्ट पार्नुभएको छ ।

विगतमा संगठन छोडेर जानेहरु पुनः आत्माआलोचना गरेर फर्कन चाहेमा स्वागत गर्ने पनि खनालले बताउनुभयो ।

मूल प्रवाह अखिल भारत नेपाली एकता समाज मध्य पश्चिमोत्तर क्षेत्रीय समितिले आयोजना गरेको आठौं अखिल भारत सम्मेलनको प्रचारात्मक भेलालाई सम्बोधन गर्दै महासचिव खनालले विभिन्न कारणले संगठनबाट अलग भएका सदस्यहरुलाई पुनः संगठनमा फर्केर देश, जनता र प्रवासी नेपालीको हक हितमा काम गर्न आग्रह पनि गर्नुभयो ।

‘कतिपय बेलामा हाम्रो संगठनबाट केही साथीहरु बाहिर जाने गरेका छन् र अहिले पनि केही साथीहरु हाम्रो संगठनबाट अलग भएका छन्’ महासचिव खनालले भन्नुभयो, ‘हाम्रो संगठनले कहिले पनि कसैप्रति कुनै किसिमको पूर्वाग्रह राखेको छैन । त्यसैले संगठन छाडेर गएका साथीहरु आत्मा आलोचना गरेर पुनः संगठनमा फर्कन चाहन्छन् भने ऊनीहरुको लागि हाम्रो संगठनको ढोका सधैँ खुला रहेको छ ।’

महासचिव खनालले देशको समसामयिक राजनीतिबारे चर्चा गर्दै विगतमा केपी ओली नेतृत्वको सरकारलाई पार्टीले समर्थन गरेपनि ओलीले संविधान र लोकतन्त्र नै मास्न थालेपछि समर्थन फिर्ता लिनुपरेको स्मरण गर्नुभयो । उहाँले जापानी साम्राज्यवादको विरुद्धको संघर्षमा माओत्सेतुङले च्याङ काइ सेकसित समेत कार्यगत एकता गरेको उदाहरण प्रस्तुत गर्दै अहिले नेपाली कांग्रेस समेतको गठबन्धनमा सामेल हुनुको अर्थ लोकतन्त्रको रक्षाका खातिर रहेको तर, कांग्रेसले गरेका अपराधलाई समर्थन नहुने पनि स्पष्ट पार्नुभयो ।

राजस्थान सरकारले आइतबारका दिन जयपुरमा कर्फ्यु लगाएको कारण उक्त कार्यक्रम भर्चुअल माध्यमबाट सम्पन्न भएको थियो । नारायण ज्ञवालीको सन्चालन, मोहन गिरीको अध्यक्षता ग्रहण पश्चात कार्यक्रममा ईश्वरी आचार्यले स्वागत मन्तव्य राख्नु भएको थियो ।

कार्यक्रमका अन्य अतिथिहरुमा मूल प्रवाह केन्द्रीय सांस्कृतिक विभागका रिम राना, केन्द्रीय महिला बिभागबाट हुमा रजाली, विद्यार्थी संघका केन्द्रीय सहसचिव कृष्टि राई, जनजाति केन्द्रीय विभागका ओम थापा, केन्द्रीय खेल विभागका काजीराम श्रेष्ठ, नेपाली एकता अनलाइन एवं नेपाली समाचार साप्ताहिकका प्रतिनिधि ज्ञान प्रसाद शर्मा हुनुहुन्थ्यो ।

भेलाले अध्यक्ष बेलबहादुर रजालीको संयोजकत्वमा ६१ सदस्यीय आठौं अखिल भारत सम्मेलन सहयोग समिति गठन गरेको छ भने किशोर राईको संयोजकत्वमा ५ सदस्यीय आर्थिक उपसमिति, रिम रानाको संयोजकत्वमा ९ सदस्यीय सांस्कृतिक उपसमिति र काजीराम श्रेष्ठको संयोजकत्वमा ७ सदस्यीय स्वयम सेवक उपसमिति गठन गरेको छ।