कृष्ण केसी, काठमाडौं । यूएई नेपाली एकता समाजले समाजका पूर्वमहासचिव प्रेमराज भण्डारीको परिवारलाई आर्थिक सहयोग गरेको छ ।
समाजका केन्द्रीय सदस्य तथा महिला विभाग अध्यक्ष बिनु केसी र केन्द्रीय सदस्य तथा महिला विभागका सदस्य दुर्गा नेपाली चेलिले ८९ हजार ३२० रुपैयाँ भण्डारी परिवारलाई हस्तान्तरण गर्नुभएको छ ।
पूर्व महासचिव भण्डारीको गत अक्टोबर ८ का दिन यूएईको अस्पतालमा उपचारको क्रममा निधन भएको थियो। लामो समय युएई स्थित श्रमजीवी नेपालीहरुको विभिन्न समस्या हरुमा साथ सहयोग गर्दै आउनु भएका भण्डारीको आफ्नै परिवारलाई व्यवस्थित पार्ने सपना अधुरै रहेको भन्दै समाजले सहयोग गरेको हो ।
भण्डारीको निधनले उहाँका छोराछोरीहरुको पढाई अधुरो हुने अवस्था आएको रपरिवारमा दर्दनाक स्थिति उत्पन्न भएकोले राहत स्वरुप आर्थिक सहयोग संकलन गरी उक्त हस्तान्तरण गरिएको समाजले जनाएको छ ।
एकता समाजले आह्वान गरेको आर्थिक सहयोग संकलनमा साथ सहयोग गर्ने सबै सहयोगीहरूलाई युएई नेपाली एकता समाजले आभार तथा धन्यवाद प्रकट गरेको छ ।
