नयाँ दिल्ली (भारत) । मूल प्रवाह अखिल भारत नेपाली एकता समाज रेवाडी नगर समितिको पहलमा रेवाडीका श्रमजीवी नेपाली नागरिकहरुलाई कोरोनाबाट बचाउन खोप लगाइएको छ । नगर समितिको पहलमा करीब ५० जनालाई पहिलो र दोस्रो डोजको टीका लगाइएको हो ।
होटल, कोठी या अन्य स्थानमा काम गर्ने यिनी नागरिकसँग कुनै पहचान पत्र नभएर कोरोनाबाट बच्न टीका लगाउन सकेका थिएनन् ।
यसभन्दा पहिला १९ सेप्टेम्बर २०२१ को दिन संगठनको पहलमा विशेष शिविर आयोजित गरी ४०२ जना नागरिकहरु जसमा ३२० जना नेपाली नागरिकहरुलाई निःशुल्क खोप लगाउने व्यवस्था गरिएको थियो।
नगर सचिव ज्ञान प्रसाद भुसालको विशेष पहलमा सम्पूर्ण व्यवस्थापन गराउने काम भएको थियो । नगर अध्यक्ष रामबहादुर खड्का, सदस्य रूपेश रोका, विष्णु घिमिरे सहित अन्य सदस्यहरुको सहयोग पहलमा सो कार्य सम्पन्न भएको थियो।
खोपको माग गर्दै हिसारमा उपायुक्तलाई मागपत्र
यता, मूल प्रवाह नगर समिति हिसारले कोरोना विरुद्धको खोपको माग गर्दै जिल्ला उपायुक्तलाई माग–पत्र बुझाएको छ ।
रोजगारीको खोजीमा हिसार पुगेका श्रमजीवी नेपालीहरुलाई अहिले चलिरहेको कोरोना एवं ओमिक्रोन महामारिमा आधारकार्ड, राशनकार्ड बनाउन अत्यन्तै अप्ठ्यारो भएको र उक्त दस्तावेजको अभावमा कोरोना विरुद्धको खोप लगाउन कठिनाई परिरहेको भन्दै सो माग पत्र बुझाइएको हो ।
केन्द्रीय समितिका सल्लाहकार तारा सोमरे, नगर उपाध्यक्ष बाबुराम पोख्रेल, सिटिएरिया अध्यक्ष केहर सिंह घर्तिमगर, नगर महिला बिभागकि संयोजक निरु सारु, सिटिएरिया बि कि कोषाध्यक्ष सीता पोख्रेल लगायतको प्रतिनिधि मण्डलले हिसारका जिल्ला उपायुक्त भेट गरि माग पत्र बुझाएको सोमरेले जानकारी दिनुभएको छ ।
कुनै पनि कागजी प्रमाण पत्र नभएका श्रमजीवी नेपालीहरुलाई हिसार जिल्ला उपायुक्तले मूल प्रवाह अखिल भारत नेपाली एकता समाजको सिफारिसको आधारमा कोरोना भ्याक्सिन लगाउने व्यवस्था मिलाउने आश्वासन दिएका छन् ।
