काठमाडौं । देशभर पछिल्लो २४ घण्टामा थप २३८ जनामा कोरोना भाइरस संक्रमण पुष्टि भएको छ । नौ हजार १२३ को पीसीआर परीक्षण गर्दा सो संख्यामा संक्रमण पुष्टि भएको हो ।
योसँगै नेपालमा पीसीआर विधिबाट गरिएको परीक्षणमा कोरोना भाइरसबाट संक्रमितको संख्या आठ लाख १९ हजार १९ पुगेको स्वास्थ्य तथा जनसंख्या मन्त्रालयले जनाएको छ । एन्टिजेन विधिबाट परीक्षण गर्नेको संख्या ९५ हजार ३१४ रहेको छ । पछिल्लो समय थप ३७० जना कोरोनाबाट निको भएका छन् । योसँगै निको हुनेको संखया आठ लाख ३५९ पुगेको छ । निको हुने दर ९७ दशमलव ७ प्रतिशत रहेको मन्त्रालयले जनाएको छ ।
कोरोनाबाट एक जनाको मृत्यु
पछिल्लो २४ घण्टामा कोरोनाबाट थप एक जनाको मृत्यु भएको छ । योसँगै कोरोनाबाट मृत्यु हुनेको संख्या ११ हजार ४९६ पुगेको छ । कोरोनाबाट हुने मृत्यु दर १.४ प्रतिशत रहेको छ ।
त्यसैगरी पछिल्लो समय ४० हजार १४जनाले खोप लगाएको मन्त्रालयले जनाएको छ । सक्रिय संक्रमितको संख्या सात हजार १६४ रहेको छ । हाल होम आइसोलेसनमा ६ हजार ६९६ छन् । संस्थागत आइसोलेसनमा ४६८ , आईसीयूमा २२७ र भेन्टीलेटरमा ५१ जनाको उपचार हुँदैछ ।
