काठमाडौं । विभिन्न देशमा रहेका गैरआवासीय नेपालीले भारतद्वारा नेपाली सीमा अतिक्रमणको विरोध कार्यक्रम जारी राखेका छन् ।
सोही क्रममा मंगलबार जर्मनीको फ्रयांकफर्टमा गैरआवासीय नेपाली संघलगायत विभिन्न नेपाली संघसंगठनले संयुक्तरुपमा प्रदर्शन गरेको गैरआवासीय नेपाली संघका अध्यक्ष कुमार पन्तले सामाजिक सञ्जाल ट्विटरमार्फत् जानकारी दिएका छन् ।
यसअघि बेलायतलगायत विभिन्न मुलुकमा रहेका नेपालीहरुले सीमा अतिक्रमणको विरोध गरेका थिए । भारतले हालै सार्वजनिक गरेको उसको नयाँ राजनीतिक नक्शामा कालापानीस्थित नेपाली भूभागलाई समेत आफ्नो नक्शामा समावेश गरेपछि देश भित्र र बाहिर त्यसको विरोध भइरहेको छ ।
ब्रसेल्सको भारतीय दूतावासअगाडि प्रदर्शन
यता,बेल्जियमका नेपालीहरुले ब्रसेल्सस्थित भारतीय दूतावास अगाडि सीमा अतिक्रमणको विरोध गरेका छन् । दुतावास अगाडि सोमबार दिउँसो उनीहरुले नाराबाजी र प्लेकार्डसहित विरोध प्रदर्शन गरेका हुन् ।
विरोध प्रदर्शनमा बेल्जियम नेपाली एकता समाज सहित बेल्जियमस्थित संघसंस्थाका प्रतिनिधि तथा नेपालीहरुको उपस्थिति रहेको बेल्जियम नेपाली एकता समाजका अध्यक्ष बालकृष्ण कँडेलले जानकारी दिनुभयो । ‘कालापानी, लिपुलेक, लिम्पियाधुरा नेपालको हो’,नेपाललाई गरिने हस्तक्षेप बन्द गर जस्ता प्ले कार्ड प्रदर्शन गरिएको थियो ।
