डडेल्धुरा । एक हप्तादेखि डडेल्धुरामा अनसनरत प्राध्यापक डा. गोविन्द केसीको स्वास्थ्यमा समस्या देखिएको छ । स्वास्थ्य अवस्था विग्रँदै गएपछि केसीलाई आइतबार डडेल्धुरा जिल्ला अस्पताल भर्ना गरिएको छ ।
डडेल्धुरा जिल्ला अस्पतालका अनुसार डा. केसीको ब्लड प्रेसर घट्न लागेको छ । मुटुको चालमा वृद्धि भई समस्या देखिएको छ भने रगतमा अक्सिजनको मात्रा घटेको छ । यस्तै, मृगौलामा समस्या देखिएको र उनको स्वास्थ्य अवस्था कमजोर बन्दै गएको छ ।
अस्पतालले डडेल्धुरामा आईसीयू सेवा, एबीजी सेवा तथा दक्ष जनशक्ति नभएकाले अन्यत्र सार्नुपर्ने जनाएको छ।
डा. केसीले यही असोज २७ गते त्रिभुवन विश्विद्यालय शिक्षण अस्पतालबाट अवकाश पाएका थिए । अवकाश लिएपछि केसीको यो पहिलो अनसन हो ।
डा. केसीले चिकित्सा शिक्षामा सुधारको माग राखेर आन्दोलन गर्न थालेको सात वर्ष भएको छ। चारबुँदे माग राखेर ०६९ असार २१ मा उनी पहिलो पटक अनशन सुरु गरेका थिए ।
डा. केसीले सोमबार डडेल्धुरा पुगेर १७ औँ अनसन सुरु गरेका हुन् । आफूसँग भएका पूर्वसहमति कार्यान्वयन गर्नुपर्ने डा. केसीको अडान छ ।
