जनकपुरधाम । जनकपुर विमानस्थलमा तोडफोड गरेको आरोपमा पक्राउ परेका सांसद प्रमोदकुमार साह साधारण तारेखमा रिहा भएका छन् । मंगलबार काठमाडौंको त्रिभुवन विमानस्थलबाट पक्राउ परेको सांसद साहलाई शुक्रबार जिल्ला अदालत धनुषाले साधारण तारेखमा छाड्न आदेश दिएको हो ।
सोमबार जनकपुरबाट काठमाडौंको बुद्ध एयरको उडान ढिलो भएको भन्दै सांसद साहले काउन्टरमा लात्ती हानेका थिए । काउन्टरमा लात्ती हानेर तोडफोड गरेको र कर्मचारी माथि दुर्व्यवहार गरेको भन्दै अर्को दिन उनलाई काठमाडौंबाट पक्राउ गरिएको थियो । सांसद साहले भने गम्भीर बिरामीलाई लिएर काठमाडौं आउनुपर्ने उडान तीनघण्टा ढिला भएपछि आक्रोशित भएको बताएका थिए ।
सरकारी वकिल कार्यालयले साहविरुद्ध सैनिक हवाई उडान ऐन २०१५ को दफा ९ (क) को आधारमा अपराध गरेको कारणले उनिमाथि पाँच वर्षदेखि दस वर्षसम्मको कैद सजायको मागदाबीसहित जिल्ला अदालतमा मुद्दा दायर गरेको थियो ।
तर अदालतले उक्त मागदाबी नमिल्ने भन्दै साधारण तारेखमा छोड्न आदेश दिएको छ । शुक्रबार जिल्ला न्यायाधीश तेजनारायण पौडेलको इजलासले उनलाई साधारण तारेखमा छोड्न आदेश दिएको हो ।
