काठमाडौं । प्रहरीले नेत्रविक्रम चन्द ‘विप्लव’ नेतृत्वको नेकपाको बैठकमा छापा मारी २१ जना नेतालाई गिरफ्तार गरेको छ । पक्राउ पर्नेमा दुईजना केन्द्रीय सदस्यसहित अधिकांश राप्ती ब्युरोका नेताहरु छन् ।
दाङको गढवास्थित एक घरमा बसेको नेकपा राप्ती ब्यूरोको बैठकमा प्रहरीले छापा मारेको हो । नेकपाका केन्द्रीय सदस्य एवं मध्यपश्चिम ब्यूरो इन्चार्ज चन्द्रबहादुर चन्द ‘वीरजङ्ग’ र अर्का केन्द्रीय सदस्य तथा राप्ती ब्युरो इन्चार्ज सुभास बाठालाई प्रहरीले गिरफ्तार गरेको हो । दुई केन्द्रीय सदस्यसँगै नेकपा निकट युवा सङ्गठनका केन्द्रीय अध्यक्ष पाटन जङ्गलीलाई पनि प्रहरीले गिरफ्तार गरेको छ ।
५ नं प्रदेश प्रहरी कार्यालय र जिल्ला प्रहरी कार्यालय, दाङबाट खटिएको टोलीले समूहको राप्ती ब्युरो बैठकमा छापा हानेको थियो । बैठकस्थलमा छापा मारी विप्लव समूहका महत्वपुर्ण दस्तावेजसमेत बरामद गरिएको प्रहरीले जनाएको छ ।
स्रोतका अनुसार केन्द्रीय सदस्य चन्द्रबहादुर पार्टी महासचिव नेत्रविक्रम चन्द विप्लवका दाजु हुन् ।
