काठमाडौं । सत्तारुढ दल नेकपाका सांसद पार्वत गुरुङविरुद्ध ज्यान मार्ने उद्योगमा पक्राउ पुर्जी जारी भएको छ। नेकपाका केन्द्रीय सदस्यसमेत रहेका दोलखाका सांसद गुरुङलाई काठमाडौँ जिल्ला अदालतको आदेशमा जिल्ला प्रहरी कार्यालय दोलखाले पक्राउ पुर्जी जारी गरेको हो ।
अदालतले असोज ८ गते नै सांसद गुरुङलाई पक्राउ पुर्जीको म्याद तामेल गरेको भएपनि घटना ढिलो गरी सार्वजनिक भएको हो ।
सांसद गुरुङविरुद्ध वीरध्वज खड्काले २०७६ को वैशाख २९ गते काडमाडौँ जिल्ला अदालतमा ज्यान मार्ने कसुरको जाहेरी दर्ता गरेका थिए । खड्कामाथि स्थानीय निर्वाचनलगत्तै सांसद गुरुङ नेतृत्वको टोलीले आक्रमण गरेको आरोप लागेको थियो ।
आक्रमण लगत्तै खड्काले उनीविरुद्ध महानगरीय प्रहरी परिसर काठमाडौँमा ज्यान मार्ने उद्योगमा जाहेरी दिएका थिए। तर प्रहरीले उनलाई पक्राउ गरेका थिएन्।
सो मुद्दामा गुरुङसँगै दोलखाको गौरीशंकर गाउँपालिकाकै मिनबहादुर तामाङ, कसराङ मन्ने कर्ण तामाङ, उर्मिला थामी, जीवन तामाङ, सागर तामाङ, सविन तामाङलाई प्रतिवादी बनाइएको छ।
काठमाडौँ जिल्ला अदालतले १२ भदौ २०७६ मा जिल्ला प्रहरी कार्यालय दोलाखालाई पत्र पठाउँदै अदालत उपस्थित गराउन आदेश गरेको थियो ।
यता, सांसद गुरुङले भने घटना राजनीतिक भएको र ‘खासै ठुलो कुरा नभएको’ प्रतिक्रिया दिएका छन् ।
