काठमाडौं । जनकपुर विमानस्थलमा बुद्ध एयरको काउन्टर तोडफोड गरेको आरोपमा राजपाका सांसद प्रमोद साह पक्राउ परेका छन् । महानगरीय अपराध अनुसन्धान महाशाखाको विशेष टोलीले सांसद साहलाई मंगलबार बिहान पक्राउ गरेको हो ।

सांसद साहलाई ओखलढुंगा जाने क्रममा त्रिभुवन विमास्थलबाट पक्राउ गरिएको महाशाखाले जनाएको छ ।

साहले सोमबार काठमाडौं आउने क्रममा जहाज उडाउन ढिला गरेको भन्दै सोमबार जनकपुर विमानस्थलस्थित बुद्ध एयरको काउन्टर तथा भीआईपी क्षेत्रमा समेत तोडफोड गरेका थिए ।

उक्त विमानमा समयमै काठमाडौंको अस्पतालमा पुग्नुपर्ने किड्नीका बिरामी भएको र आफूले त्यसबारे पटकपटक विमान कम्पनिका कर्मचारीलाई भन्दा पनि सुनुवाई नगरेकाले आक्रोशित भएको सांसद साहले बताएका थिए ।

साह सर्लाही १ बाट निर्वाचित सांसद हुन् ।