काठमाडौं । राष्ट्रियताका विषयमा सहकार्य गर्न गठित २१ राजनीतिक तल तथा संगठनहरुको कार्यगत एकतामा थप एक संगठन मिसिएको छ । नेकपा (मसाल) का महामन्त्री मोहनविक्रम सिंहसहितका नेताहरुको सहभागितामा बिहीबार बसेको संयुक्त बैठकले समाजवादी राष्ट्रिय मञ्च, नेपाललाई कार्यगत एकतामा सामेल गर्ने निर्णय गरेको हो ।
सो बैठकले एमसीसीको खारेजी, सीमा अतिक्रमण तथा भ्रष्टाचारको विरोध, बेरोजगारी समस्या समाधान लगायतका मा राखि थप कार्यक्रमसमेत घोषणा गरेको छ । घोषित कार्यक्रम अनुसार आगामी मंसिर ७ गते दिनको १ बजे काठमाडौंको माइतीघर मण्डलामा विरोध कार्यक्रमको आयोजना गरिनेछ । यसै प्रकारको कार्यक्रम देशका सबै प्रदेशले कम्तीमा एक–एक स्थानमा समेत आयोजना हुनेछ।
बैठकपछि देशभक्त जनगणतान्त्रिक मोर्चाका अध्यक्ष सीपी गजुरेलले २१ राजनीतिक संगठनहरुको तर्फबाट जारी गर्नुभएको विज्ञप्तिमा भनिएको छ, ‘अमेरिकी संस्था एमसीसीसँग नेपालका विभिन्न सरकारद्वारा विभिन्न समयमा गरिएका राष्ट्रघाती सम्झौताको खारेजी, भारतले अतिक्रमण र कब्जा गर्दै आएको लिम्यिाधुरा–कालापानी–लिपुलेक, सुस्ता, महेशपुर आदि भूभागमाथि नेपालको स्वामित्व कायम गर्ने, कोभिड–१९ को रोकथाम, नियन्त्रण र निःशुल्क उपचार, बेरोजगार र विपन्न वर्गलाई खानालगायत न्यूनतम सुविधा, रोजगारीको व्यवस्था, निःशुल्क शिक्षा र स्वास्थ्यको व्यवस्था, उखु किसानको बक्यौता रकम तुरुन्त दिलाउने आदि विषयमा कार्यगत एकताले गर्दै आएको संघर्षलाई अझ सशक्त बनाउने निर्णय गरिएको छ ।’
यस्तै बैठकले ‘कार्यगत एकतालाई अझ व्यवस्थित गर्न र यसलाई अझ माथि उठाउनका लागि नीतिगत आन्तरिक छलफल चलाउनुका साथै संगठनात्मक संरचनाहरु निर्माण गर्ने विषयमा पनि आन्तरिक रुपमा छलफल गरी आगामी बैठकमा निर्णय लिइने’ गजुरेलद्वारा जारी वक्तव्यमा उल्लेख छ ।
कार्यगत एकतामा सम्मिलित २१ राजनीतिक सङ्गठनहरु निम्न छन् ।
१. नेकपा (मसाल) २. नेकपा (क्रान्तिकारी माओवादी), ३. नेकपा (माले), ४. राष्ट्रिय जनमोर्चा, नेपाल ५. देशभक्त जनगणतान्त्रिक मोर्चा, नेपाल ६. नेपाल कम्युनिस्ट पार्टी, ७. नेकपा (माओवादी केन्द्र), ८. राष्ट्रिय जागरण मञ्च, ९. जनसमाजवादी पार्टी, १०. नेकपा (संयुक्त), ११. राष्ट्रिय जागरण परिषद्, नेपाल १२. वैज्ञानिक समाजवादी कम्युनिस्ट पार्टी, १३. नेकपा (बोल्शेविक), १४. राष्ट्रवादी केन्द्र, नेपाल, १५. एम.सी.सी. खारेज अभियान, १६. पुष्पलाल अध्ययन समाज, १७. सर्वहारा कम्युनिस्ट पार्टी (माओवादी), १८. मार्क्सवादी एकता अभियान, १९. नेकपा (मार्क्सवादी), २०. नेकपा मार्क्सवादी (पुष्पलाल) र २१. ने.क.पा. (माओवादी), २२. समाजवादी राष्ट्रिय मञ्च, नेपाल ।
