काठमाडौं । भूकम्पले क्षतिग्रस्त चार जिल्लाका २४ विद्यालय पुनःनिर्माणका लािग त्रिपक्षीय सम्झौता भएको छ । राष्ट्रिय पुनःनिर्माण प्राधिकरण, नेपालस्थित नर्वेजियन राजदूतावास तथा युनाइटेड नेसन्स अफिस फर प्रोजेक्ट सर्भिसेस (युएनओपिएस) बीच सिन्धुली, रामेछाप, भक्तपुर र काठमाडौँका गरी २४ विद्यालय पुनःनिर्माणका लागि समझदारी भएको हो ।

नर्वे सरकारको करीब ८० लाख अमेरिकी डलर सहयोगमा सिन्धुली, रामेछाप, भक्तपुर र काठमाडौँका क्षतिग्रस्त विद्यालय बन्नेछन् । परियोजनाअन्तर्गत रामेछापमा १३, सिन्धुलीमा नौ तथा काठमाडौँ र भक्तपुरमा एक–एक वटा विद्यालय पुनःनिर्माण हुनेछ । यसमा १४४ कक्षाकोठा रहने छन् । अपाङ्गमैत्री यी विद्यालयमा शौचालय, खानेपानीको सुविधा हुनेछ ।

विद्यालय पुनःनिर्माण भएपछि करीब पाँच हजार ५०० विद्यार्थी लाभान्वित हुनेछन् । परियोजनाको अवधि सन् २०२१ नोभेम्बर (२०७८ मङ्सिर १४) सम्म रहेको छ ।समझदारीपत्रमा प्राधिकरणका तर्फबाट सहसचिव पीताम्बर घिमिरे, नर्वेजियन राजदूतावासका तर्फबाट नेपालका लागि नर्वेजियन राजदूत लास्से जोर्न जोहानेसेन र युएनओपिएसका देशीय निर्देशक (कन्ट्री डाइरेक्टर) चाल्र्स क्यालानानले हस्ताक्षर गरे ।

हस्ताक्षरपछि प्राधिकरणका प्रमुख कार्यकारी अधिकृत सुशील ज्ञवालीले परियोजना समयमै सफल कार्यान्वयन हुने विश्वास व्यक्त गरे । प्राधिकरण भूकम्पपछिको पुनःनिर्माणमा विकास साझेदारसँग समन्वय तथा मिलेर काम गर्दै आएको र गर्न तयार रहेको पनि उनले उल्लेख गरे ।

नेपालका लागि नर्वेका राजदूत जोहानेसेले भूकम्पबाट क्षति भएका विद्यालयको पुनःनिर्माणका लागि प्राधिकरण तथा युएनओपिएससँग साझेदारी गर्न पाउँदा गर्व लागेको बताए । प्राधिकरण योजना तथा बजेट व्यवस्थापन महाशाखा प्रमुख सहसचिव पीताम्बर घिमिरेले परियोजनाले भूकम्पपछिको पुनःनिर्माणमा योगदान गर्नुका साथै दुई देशबीचको सम्बन्घमा पनि नयाँ आयाम थपिने विश्वास व्यक्त गरे ।युएनओपिएसका देशीय निर्देशक चाल्र्स क्यालानानले तोकिएको समय र गुणस्तरमा विद्यालय पुनःनिर्माण गर्ने प्रतिबद्धता बताए ।