काठमाडौँ । नेपाल कम्युनिस्ट पार्टी (मसाल)का प्रवक्ता रामप्रकाश पुरीले सहकारी क्षेत्रमा देखिएको समस्या समाधानका लागि ठगीमा संलग्न व्यक्तिमाथि छानबिन गरी दोषीलाई कानुनी कारबाही गर्नुपर्ने बताउनु भएको छ ।
असौज ४ गते मनोज भट्टद्वारा लिखित ‘सहकारीमा ठगीको जालो’ पुस्तक विमोचन कार्यक्रममा धारणा राख्दै प्रवक्ता पुरीले सहकारी क्षेत्रमा देखिएका समस्या केवल व्यक्तिविशेषको विषय नभई समग्र प्रणालीसँग जोडिएको विषयभएको बताउनु भयो ।
उहाँले सहकारीका नाममा सर्वसाधारणको बचत दुरुपयोग हुने अवस्था अन्त्य गर्न राज्यले प्रभावकारी नियमन, अनुसन्धान र कारबाहीलाई प्राथमिकता दिनुपर्नेमा जोड दिए । सहकारी क्षेत्रमा देखिएका विकृति र विसंगतिको यथार्थ पहिचान गरी बचतकर्ताको रकम सुरक्षित गर्ने वातावरण बनाउनुपर्ने उहाँको भनाइ थियो ।
पुरीले सहकारी क्षेत्रमा उत्पन्न समस्याका कारण सर्वसाधारणमा परेको असरलाई गम्भीर रूपमा लिनुपर्ने उल्लेख गर्दै सम्बन्धित निकायले तथ्यका आधारमा अनुसन्धान अघि बढाउनुपर्ने बताउनु भयो । उहाँले सहकारीको समस्या समाधानका लागि आवश्यक कानुनी तथा संस्थागत सुधारसँगै जनताको बचत फिर्ता गर्ने विषयलाई पनि प्राथमिकतामा राख्नुपर्ने धारणा राखे ।
कार्यक्रममा पुस्तकका लेखक मनोज भट्टले सहकारी क्षेत्रमा देखिएका ठगी तथा विकृतिका विभिन्न पक्षलाई पुस्तकमार्फत उजागर गर्ने प्रयास गरिएको बताउनु भयो । उहाँले सहकारी क्षेत्रमा देखिएका समस्या, त्यसबाट पीडित बचतकर्ता तथा नियमनको अवस्थाबारे सार्वजनिक बहस आवश्यक रहेको बताउनु भयो ।
‘सहकारीमा ठगीको जालो’ पुस्तकले सहकारी क्षेत्रमा देखिएका समस्या, ठगीका प्रवृत्ति तथा त्यसबाट उत्पन्न सामाजिक र आर्थिक प्रभावबारे चर्चा गरेको जनाइएको छ ।
