खिमराज चालिसे, चन्डिगढ ।
भोटेकोशीमा आएको भीषण बाढीका कारण नेपालका रसुवा, धादिङ, नुवाकोट र चितवनलगायतका जिल्लामा भएको मानवीय क्षतिप्रति पन्जाबको पटियालास्थित नेपाली समुदायले गहिरो दु:ख व्यक्त गरेका छन् ।
सेप्टेम्बर ६, २०२६ का दिन पटियालाको पशुपतिनाथ मन्दिर एवम् धर्मशालामा मूल प्रवाह अखिल भारत नेपाली एकता समाजसमेत विभिन्न नेपाली सङ्गठनले एक कार्यक्रमको आयोजना गरी मृतकप्रति हार्दिक श्रद्धाञ्जली तथा घाइतेको शीघ्र स्वास्थ्यलाभको कामना गरेका हुन् ।
कार्यक्रममा मूल प्रवाहसँगै, प्रवासी नेपाली सङ्घ, नेपाली जनसम्पर्क समिति, नेपाली समाज भारत, अल इन्डिया गोर्खा ठकुरी समाज, पशुपतिनाथ सेवा सोसाइटी र सामाजिक न्याय नेपाली समाजलगायतका विभिन्न सङ्घसङ्गठनको बाक्लो उपस्थिति थियो ।
उपस्थित सबैले पीडितको घाउमा मल्हमपट्टी लगाउन आआफ्नो स्थानबाट एकजुट भएर सहयोग गर्ने प्रतिबद्धतासमेत जनाएको सीताराम क्षेत्रीले बताउनुभयो ।
वक्ताहरूले बिपदको १०–१२ दिन बितिसक्दा पनि मानिसहरू जीवितै फेला परिरहेकाले आशाको किरण बाँकी रहेको भन्दै उद्धार कार्यमा ढिलाइ नगर्न सरकारसँग आग्रहसमेत गरे ।
एक मिनेट मौनधारणबाट सुरु भएको सो कार्यक्रमको समापन मैनबत्ती बालेर गरिएको थियो ।
