धनगढी । कैलालीको धनगढीमा चौबिसौँ अनशनरत डा गोविन्द केसीको स्वास्थ्य अवस्था बिग्रिएपछि सेती प्रादेशिक अस्पतालमा भर्ना गरिएको छ ।
धनगढीको कृष्णमन्दिर धर्मशालाको २११ नम्बर कोठामा अनशनमा बसेका केसीको स्वास्थ्य अवस्था बिग्रिएपछि २०८३ साउन ९ गते शनिबार चिकित्सकको सल्लाहमा अस्पताल सारिएको हो ।
डा केसी सेती प्रादेशिक अस्पतालका चिकित्सक डा गजेन्द्र दुवालको निगरानीमा छन् । यसअघि शनिबार बिहान प्रादेशिक अस्पतालका चिकित्सक डा दुवालले नै उनको स्वास्थ्यपरीक्षण गरेका थिए ।
परीक्षणका क्रममा डा केसीको रक्तचाप ११०/९० र रक्तमा सुगरको मात्रा ५० रहेको पाइएको थियो । सुगरको मात्रा अत्यन्त न्यून भएकाले स्वास्थ्य अवस्था जटिल बन्दै गएको चिकित्सकले बताएका थिए । चिकित्सकले तत्कालै अस्पतालको आइसियुमा भर्ना गरी उपचार गर्न सुझाव दिएका छन् ।
डा केसीका सहयोगी अमृत जैशीका अनुसार स्वास्थ्य अवस्था बिग्रिदै गएपछि मांसपेशी बाउडिने, बोल्न पनि असहज हुने, खुट्टाको अप्रेसन गरेका कारण हिँडडुल गर्न पनि कठिन भएपछि बाथरुम जान पनि समस्या भइरहेको छ ।
यता, केसीले उठाएका माग सम्बोधन गर्न सरकार तयार रहेको शिक्षा तथा खेलकुदमन्त्री सस्मित पोखरेलले बताइसकेका छन् । शुुक्रबार साँझ डा केसीका सहयोगी जैशीसँग कुरा गरेका मन्त्री पोखरेलले राति ११ बजेतिर स्वयम् केसीसँगै फोन संवाद गरेका थिए । संवादका क्रममा पोखरेलले सरकार माग सम्बोधन गर्न प्रतिबद्ध रहेको बताएका थिए ।
केसीले पाँच मागका अतिरिक्त सहिद दशरथचन्द स्वास्थ्य विज्ञान विश्वविद्यालयमा तत्काल तीन सय शैयाको अस्पताल सञ्चालन गर्नुपर्ने, चिकित्सा शिक्षाको अध्ययन थाल्नुुपर्ने र स्वार्थप्रेरित भएर गरिएको उपकुुलपति र रजिस्ट्रारको नियुक्ति खारेज गर्नुपर्ने बटमलाइन भएको बताएका थिए ।
जवाफमा मन्त्री पोखरेलले ती माग सम्बोधन गर्ने गरी वार्ता टोली गठन गर्ने र सम्भव भएमा आफैँ धनगढी आउने बताएको केसीका सहयोगी डा. जैशीले बताए ।
