शङ्करप्रसाद पोख्रेल, बुटवल ।
कम्युनिस्ट सङ्ग्रहालयले आयोजना गरेको तीन दिने युवा स्वरोजगार तथा उद्यमशीलता क्षमता अभिवृत्ति कार्यक्रम समापन भएको छ ।
२०८३ जेठ १५ देखि सङ्ग्रहालयको सभाकक्षमा सुरु भएको सो कार्यक्रम जेठ १७ गते समापन भएको हो ।
युवा विद्यार्थी र व्यवसायीहरूको सिप विकास, उद्यमशील सोचको अभिवृद्धि तथा आत्मनिर्भरता प्रवद्र्धन गर्ने उद्देश्यले आयोजित तालिमको उद्घाटन बुटवल उपमहानगरपालिकाका नगरप्रमुख खेलराज पाण्डेले गर्नुभएको थियो ।
सो अवसरमा मन्तव्य राख्दै उहाँले युवालाई स्वरोजगार र उद्यमशीलतामार्फत आत्मनिर्भर बन्न प्रेरित गर्दै यस्ता कार्यक्रमले समाज र राष्ट्र निर्माणमा सकारात्मक योगदान पुर्याउने बताउनुभयो ।
उद्घाटन कार्यक्रममा पालिकाका प्रमुख प्रशासकीय अधिकृत दीपक ज्ञवालीले पनि मन्तव्य राख्नुनभएको थियो ।
तालिममा युवा स्वरोजगार, उद्यमशीलता, कृषि व्यवसाय, अर्थतन्त्र, सिप विकास, सङ्ग्रहालय व्यवस्थापन तथा समसामयिक सामाजिक–आर्थिक विषयमा विभिन्न क्षेत्रका विज्ञले प्रशिक्षण दिनुभएको थियो ।
तालिममा सहभागी युवाले उद्यम सञ्चालन, स्वरोजगारका सम्भावना, नेतृत्व विकास तथा आत्मनिर्भर अर्थतन्त्र निर्माणमा युवाको भूमिकाबारे जानकारी प्राप्त गरेका थिए ।
समापन समारोहमा बोल्दै राजमो केन्द्रीय सल्लाहकार बद्रे आलम, नेकपा (मसाल) रुपन्देहीका प्रवक्ता लालचन्द पन्त, सहभागीको तर्फबाट नरेन्द्र केसी, वर्षा पोख्रेल र अजय रेश्मीमगरले यस्ता तालिमले युवामा सकारात्मक सोच, नेतृत्व क्षमता र उद्यमशीलताको विकास गर्न महत्त्वपूर्ण भूमिका खेल्ने धारणा राख्नुभयो ।
कार्यक्रममा धन्यवाद मन्तव्य सङ्ग्रहालयका केन्द्रीय सदस्य गणेश गौतमले राख्नुभएको थियो ।
कार्यक्रमको अध्यक्षता सङ्ग्रहालयका अध्यक्ष चेतनाथ आचार्यलेर र सञ्चालन लीलबहादुर केसीले गर्नुभएको थियो ।
