काठमाडौँ । हनी ट्र्यापमार्फत करोडौँ रुपैयाँ ठगी गरेको आरोपमा थाइल्यान्डबाट शनिबार पक्राउ परेकी चर्चित टिकटकर तुलसी अधिकारीलाई सोमबार अदालतमा पेस गरिने भएको छ ।
थाइल्यान्डबाट पक्राउ गरेर नेपाल ल्याइएकी उनलाई सोमबार अदालतमा पेस गर्न लागिएको हो । उनको नाममा इन्टरपोलबाट ‘रेडनोटिस’ जारी भएको थियो ।
थाइल्यान्डमा पक्राउ परेकी ३२ वर्षीया अधिकारीलाई शनिबार नेपाल ल्याएर ललितपुर प्रहरीको हिरासतमा राखिएको छ । उनलाई सोमबार अदालतमा पेस गरिने प्रहरीले जनाएको छ ।
नवलपरासी घर भएकी अधिकारी विरुद्ध छ करोड ५२ लाख २९ हजार ७५ रुपैयाँ ठगी गरेको कसुरमा मुद्दा दायर भएको थियो ।
जिल्ला सरकारी वकिल कार्यालय ललितपुरले चार महिनाअघि ललितपुर जिल्ला अदालतमा अधिकारीविरुद्ध मुद्दा दर्ता गरेको हो।
एक जना अटो व्यवसायीको जाहेरीका आधारमा अधिकारी विरुद्ध आपराधिक लाभ, ठगी, आपराधिक विश्वासघात, सङ्गठित अपराध र सम्पत्ति शुद्धीकरणसमेत गरी पाँचओटा कसुरमा मुद्दा चलाइएको छ।
सहमतिको शारीरिक सम्बन्धलाई हतियार बनाई पीडितलाई जबरजस्ती करणीको झुटो मुद्दा हाल्ने धम्की दिँदै करोडौँ रुपैयाँ असुलेको प्रहरी अनुसन्धानबाट खुलेको छ । उक्त रकम नेपाल र चीनमा लगानी गरी सङ्गठित रूपमै सम्पत्ति शुद्धीकरण गरेको दाबी अभियोगपत्रमा गरिएको छ ।
पीडित व्यवसायीले गत साउनमा प्रहरीमा जाहेरी दिएपछि यसको अनुसन्धान सुरु भएको थियो । अभियोगपत्रअनुसार २०७५ सालमा व्यावसायिक सिलसिलामा उनीहरूबिच चिनजान भएको थियो ।
बुटवलको एक होटलमा आपसी सहमतिमा शारीरिक सम्बन्ध भएपछि अधिकारीले ‘भनेजति रकम नदिए प्रहरीमा जबरजस्ती करणीको मुद्दा हाल्ने’ भन्दै ब्ल्याकमेल सुरु गरेकी थिइन् ।
